Qostanaılyq volonterler aýrýhanalarǵa ottegi ballondary men dári-dármekter tasyp júr
Qostanaı qalasynyń emhanalary ottegi toltyrylǵan ballondardy, dári-dármek ónimderin tasý jumystaryna adam qajet ekenin aıtyp, áleýmettik jelilerge jazba qaldyrǵan. 11 shildeden bastap Qostanaı oblysy ákimdiginiń jastar saıasaty máseleleri jónindegi basqarmasynyń basshylyǵy tıisti kómek kórsetý úshin qala eriktileriniń jıynyn uıymdastyrdy.
«Osynaý qıyn shaqta birlik tanytýymyz qajet. Sonda ǵana qaýipti indetti jeńemiz. Qazir vırýspen kúreste dárigerlerdiń aldyńǵy shepte júrgeni málim. Sol sebepti bizdiń basqarma oblys turǵyndaryna úndeý jarııalap, kómektesýge shaqyrdy. Bul úndeýge ártúrli jastaǵy, túrli kásip ókilderi ún qatty. Máselen, birinshi kúnnen bastap mádenıet qyzmetkerleri, jeke kásipkerler, stýdentter, órt sóndirýshiler bizben birge. Qazir ottegi ballondaryn emhanalarǵa jetkizý jumystarymen aınalysyp júrmiz. Búgin óńirdegi sý tasýshy kompanııa habarlasyp, aýyzsý jetkizýge kómektesetinin aıtty. Mundaı jumystar jalǵasady», - dedi basqarma basshysynyń mindetin atqarýshy Saıat Shaımurynov.
Volonterler jumys tańdap jatqan joq. Kúnde shamamen 10-15 adam «qara» jumysta júr. Solardyń biri – kásipker Nurjan Sárinjipov.
«Biz dostarymyzben kómek kórsetýge keldik. Qazir qalalyq aýrýhananyń bazasynda tapsyrylǵan sharýalarǵa qol ushyn sozyp jatyrmyz. Qolymyz qalt etkende medıtsına qyzmetkerlerine kómektesýge ýáde ettik. Ákimdik, ıa bolmasa, aýrýhana basshylyǵynyń nusqaýy bolǵan emes. Áleýmettik jelilerden eriktilerdiń usynysyn kórip, qabyl aldyq. Bir kıslorod ballony bir naýqasqa tezirek jetse degen tilek qana. Tańǵy 9-dan bastap osynda júrmiz. Qoldan kelgenshe kómekti aıamaımyz», - deıdi kásipker.
Volonterler búgin keshke deıin qalalyq provızorlyq statsıonarda ottegi toltyrylǵan ballondardy túsirmek.
