Qostanaılyq úsh búldirshinniń ómirin jalmaǵan órttiń aldyn ala sebebi anyqtaldy

QOSTANAI. QazAqparat – Amangeldi aýdanynyń Amangeldi aýylynda bolǵan oqıǵanyń aldyn ala sebebi anyqtaldy. Órt uıaly qurylǵyny qýattaý kezinde elektr symdarynyń qysqa tuıyqtalýynan bolǵan. Bul týraly oblystyq TJD bastyǵy Birjan Kárimov málim etti, dep habarlaıdy QazAqparat tilshisi.

Symnan tutanǵan jalyn as úı bólmesindegi jumsaq jıhaz ben basqa da zattarǵa taralady. Órt sóndirýshiler jetkenge deıin kórshileri úsh búldirshindi evakýatsııalap, taǵy bir bala óz betinshe terezeden shyqqan. Bul ýaqytta olardyń ata-anasy jumysta bolǵan. Ókinishke qaraı, úsh bala ortalyq aýdandyq aýrýhanada qaıtys boldy. Ortasha dárejede ıis tıip, tiri qalǵan toǵyz jasar bala aýrýhanada jatyr. Eske sala keteıik, oqıǵa 31 naýryz kúni bolǵan edi .

«Órt faktisi boıynsha QR QK 292-baby 3-tarmaǵymen qylmystyq is qozǵaldy, sebebi men oshaǵyn anyqtaý úshin órt tehnıkalyq saraptamasy taǵaıyndaldy», - dedi B. Kárimov.

Sondaı-aq, departament bastyǵy oblysta órttiń aldyn alý boıynsha qabyldanyp jatqan sharalarǵa qaramastan, jaǵdaıdyń kúrdeli kúıde qalyp otyrǵanyna toqtaldy. Bul rette bir ǵana profılaktıkalyq jumystyń azdyq etetinin aıtty. Atap ótkenindeı, órtke turǵyn úıdiń eskirýi, elektr symdarynyń tozýy, órt qaýipsizdiginiń qarapaıym talaptarynyń elenbeýi, spırttik ishimdikterdi asyra paıdalaný jáne balalardy qaraýsyz qaldyrý sııaqty birneshe jaǵdaı sebep bolýy múmkin.