Qostanaılyq ulymen kezdestirmegeni úshin alıment tólemeıtin boldy
QOSTANAI. QazAqparat - Qostanaı aýdandyq soty QR ákimshilik quqyq buzýshylyq kodeksiniń 669-baby boıynsha («Atqarýshylyq qujatty oryndamaý») aıyptalǵan 45 jastaǵy azamatqa qatysty ákimshilik isti qarady, dep habarlaıdy QazAqparat oblystyq sottyń baspasóz qyzmetine silteme jasap.
Boryshker S. 2011 jyly týǵan uly E-niń paıdasyna alıment tóleýden birneshe ret jaltarǵan. Ol atqarýshylyq qujatty oryndamaǵany úshin ákimshilik jáne qylmystyq jaýapkershilikke tartylatyny týraly eskertý hatyn aldy.
Alaıda, S. áli kúnge deıin sot talaptaryn oryndamady. Onyń qaryzy tamyz aıynan bastap 1 mln 187727 teńgege jetken.
Aıyptalýshy alıment tóleýden bas tartqanyna burynǵy jubaıyn kináli sanaıdy. Onyń sózinshe, anasy ulymen júzdesýge tyıym salǵan.
Sot isti jan-jaqty zerttep, azamat S-ny ákimshilik jaýapkershilikke tartty. Ol aıyppul túrinde memleket esebine 16 myń teńge aqsha aýdarady. Sot qaýlysy zańdy kúshine engen joq.
