Qostanaılyq «Túımeqyz» sulýlyq konkýrsynda ekinshi vıtse-mıss atandy
QOSTANAI. QazAqparat - «Túımeqyz» esimimen tanymal qostanaılyq Tursynaı Qabyl respýblıkalyq sulýlyq konkýrsynan júldeli oraldy, dep habarlaıdy QazAqparat tilshisi.
«Miss Virtual Kazakhstan-2018» konkýrsynyń jeńimpazdary búgin belgili boldy. Fınalǵa shyqqan bes arýdyń qatarynda qostanaılyq Tursynaı Qabyl da boldy.
«Bul baıqaýǵa ár oblystyń sulýlary qatysty. Ǵalamtor arqyly daýys bergen barsha qazaqstandyqtar meniń ekinshi vıtse-mıss atanýyma septigin tıgizdi. Qýanyshymda shek joq. Aıta keteıin, «Miss Virtual Kazakhstan-2018» baıqaýynyń bastapqy kezeńinde 3000 arý tirkeldi. Solardyń ishinen iriktelgenderdiń arasynda bolýymnyń ózi men úshin jetistik edi», - dep bólisti óz qýanyshyn T.Qabyl.
Sportsúıer qaýymǵa jaqsy tanys, Tursynaı Qabyldyń Paralımpıadalyq paýerlıftıngten halyqaralyq dárejedegi sport sheberi degen ataǵy da bar. Onyń aıtýynsha, ózine maqsat qoıǵan adam tynbaı eńbektense, alynbas qamal joq.
«Ómirdiń ózi synnan turady ǵoı. Men qıyndyqtardan qoryqpaımyn. Sulýlyq baıqaýyna qatyspas buryn kóp oılandym. Rasynda, men kimnen kemmin? Ózimdi qoǵamnyń bir bólshegi retinde kórsetkim keldi. Endigi armanym - ómir týraly kitap jazý jáne múgedekterge arnap sport zalyn ashý. Bolashaqta sport jattyqtyrýshysy bolǵym keledi», - deıdi qostanaılyq «Túımeqyz».
Sonymen, «Miss Virtual Kazakhstan-2018» konkýrsynda Atyraý qalasynan qatysqan Aızada Jolmaǵambetova jeńiske jetti. Oǵan basty syılyq - avtokólik tabys etildi. Al ekinshi vıtse-mıss Tursynaıǵa 300 myń teńgeniń sertıfıkaty tapsyryldy.
