Qostanaılyq «Tobyl» eýrokýbokqa 7 jyldan keıin oraldy
ASTANA. QazAqparat - Búgin, 10 shildede fýtboldan Eýropa lıgasynyń birinshi irikteý kezeńi bastalady. Qostanaıdyń «Tobyly» Grýzııanyń «Samtredıa» komandasymen syrt alańda alǵashqy oıynyn ótkizedi, dep habarlaıdy QazAqparat tilshisi.
Grýzııalyq klýb 1936 jyly qurylǵan. Komanda ózimen attas qala namysyn qorǵaıdy. Qazirge deıin «Lokomotıv», «Samtredıa», «Djýba», «Iberııa» sekildi ataýymen jankúıerlerge jaqsy tanys. 2016 jyldyń kúzgi maýsymynda óz elinde chempıon atandy. 1994/1995, 2015/2016 jylǵy maýsymdarda grýzııa birinshiliginiń kúmis júldegeri boldy. Komanda eýrokýbok oıyndarynda kóp boı kórsete bermeıdi. 1995/1996 jyldarda ÝEFA kýbogynyń irikteý kezeńinde Makedonııanyń «Vaardar» klýbymen kezdesip, eki oıynda da 0:1; 0:2 esebimen jeńilip qaldy. Odan keıin mundaı básekede 2015/2016 jyldary el namysyn qorǵady. Sol jyly Ázerbaıjannyń «Gabala» klýbynan óz alańynda 2:1 esebimen basym túskenimen, syrt alańda 1:5 esebimen ese jiberdi. Al 2016/2017 jylǵy maýsymda olar Ázerbaıjannyń «Karabah» klýbymen Chempıondar lıgasynyń ekinshi irikteý kezeńinde jasyl alań tórinde sheberlik baıqasyp, qos kezdesýde 0:1, 0:5 esebimen jeńildi.
Ár jyldarda komanda quramynda jankúıerlerge belgili fýtbolshylar oıyn kórsetti. Olardyń qatarynda Tarıel Dvalıshvılı, Devıs Dardjanııa, Pırýz Kanteladze, Gıvı Babanıdze, Tımýr Dzagnıdze, Sergeı Shvetsov sekildi sańlaqtar bar. Sondaı-aq, ótken ǵasyrdyń toqsanynshy jyldarynda Zaza Djanashııa, Davıt Djanashııa, Kahaber Gogıchashvılı, Mıhaıl Djıshkarıanı, Georgıı Daraselııa, Zýrab Ionanıdze, Georgıı Djıshkarıanı, Grıgol Chantýrııa jáne ózge de tájirıbeli fýtbolshylar komanda namysyn qorǵady.
Býkmekerlik keńseler qazaqstandyq klýbtyń jeńisine basymdyq berip otyr. Olardyń kóbisi «Tobyl» basym túsedi degen senimde. Biraq, onyń qalaı bolaryn jasyl aalń tórindegi báseke kórsete jatady.
Aıta ketelik, «Tobyl» 2011 jyldan beri eýrokýbok oıyndaryna qaıta oralyp otyr. Qostanaılyq klýb 2003, 2007 jyldarda Intertoto kýbogynda synǵa tússe, ÝEFA kýbogynda (2009 jyldan beri Eýropa lıgasy) 2006-2010 jyldar aralyǵynda synǵa tústi. Al 2011 jyly Chempıondar lıgasynda el namysyn qorǵap, Chehııanyń Bratıslava qalasynyń «Slovan» klýbymen kezdesti. Olarmen óz alańynda 1:1 esebimen teń oınap, syrt alańda 0:2 esebimen ese jiberdi.
«Tobyl» ótken jyly el birinshiliginde úshinshi oryn alǵan Shymkenttiń «Ordabasy» klýbynyń ornyna eýrokýbok oıyndarynda synǵa túsetin bolyp sheshildi. Qazaqstan fýtbol federatsııasy «Ordabasy» klýby birqatar talaptardy oryndamaýyna baılanysty olardyń ornyna «Tobyldy» Eýropa lıgasyna qatystyrýǵa sheshim qabyldady.
Bul oıyn Astana ýaqytymen 22.00-de bastalady. Oıyn Grýzııa jerinde ótedi.
Sondaı-aq, Eýropa lıgasynda elimizdiń atynan synǵa túsetin Almatynyń «Qaıraty» Andorranyń «Engordan», Pavlodardyń «Ertisi» Lıtvanyń «Trakaı» klýbtarymen 12 shildede syrt alańda kezdesedi. Al Chempıondar lıgasynyń birinshi iirkteý kezeńinde «Astana» Chernogorııanyń «Sýteska» klýbyn 11 shildede óz alańynda qabyldaıdy.
