Qostanaılyq temirjolshy poıyz apatynyń aldyn aldy

QOSTANAI. QazAqparat - Qostanaı vagondardy paıdalaný deposy Qusmuryn stantsııasynyń tekserýshisi Sergeı Potıbenko júk vagonynyń aqaýyn anyqtady, dep habarlaıdy QazAqparat «QTJ-Júk tasymaly» AQ baspasóz qyzmetine silteme jasap. 

Ol vagonnyń búıir ramasyna jaryqshaq túskenin anyqtady. Vagonnyń búıir ramasyna túsken jaryqshaq qozǵalys qaýipsizdigine qaýip tóndirip, aıtarlyqtaı zardaptarǵa alyp keler edi.

Salada 30 jyldaı jumys istep kele jatqan temirjolshy Sergeı Potıbenkonyń aıtýynsha, onyń jumysy poıyz qozǵalysy qaýipsizdigin qamtamasyz etýmen tikeleı baılanysty.

«Tekserý kezinde biz arbalardyń «ekpinine», rychagtyq berilistiń syqyrlaýyna erekshe nazar aýdaramyz. Serippe jınaǵyn, qos dóńgelektiń birtegis syrǵýyn jáne ózge de jaıttardy baǵalaımyz. Tájirıbe arqyly erekshe mashyq qalyptasady. Biz dybys arqyly vagonnyń tehnıkalyq «densaýlyǵyn» anyqtaı alamyz», - dep atap ketti S.Potıbenko.

Jaryqshaq paıda bolǵan búıir ramasy 2013 jyly Kremenchýg qurysh quıý zaýytynda ázirlengen. Vagon ıesi - «Transfın-M» JAQ.