Qostanaılyq tanymal sportshy kisi óltirdi degen kúdikpen qamaýǵa alyndy
QOSTANAI.QazAqparat - Rýdnyı qalasynyń soty kıkboksıngten sport sheberin qamaýǵa aldy, dep habarlaıdy QazAqparat.
Ol qylmystyq quqyq buzýshylyq týraly QR QK 106-babynyń 3-bóligi boıynsha aıyptalýda.
Qaıǵyly oqıǵa Rýdnyı qalasynyń týǵan kúninde bolǵan. 20 tamyz kúni túngi birde «Gornıak» mádenı oıyn-saýyq kesheninde kúdikti 21 jastaǵy jigitke qol jumsaıdy.
«Kúdikti jigittiń basynan qolymen urady. Oǵan bas súıek-mıdiń jabyq jaraqaty, samaıdyń sol jaq bóliginiń synýy, mıdyń myljalanýy sııaqty dene jaraqattaryn salady. Densaýlyǵyna qasaqana aýyr zııan keltirgen» - dep habarlady oblystyq sottyń baspasóz qyzmeti.
Jábirlenýshi 23 tamyz kúni Rýdnyı qalasy aýrýhanasynyń jan saqtaý bóliminde qaıtys boldy. Kúdikti - kıkboksıngten QR quramasynyń negizgi múshesi, sport sheberi, Qostanaı oblysy quramasynyń kapıtany. Onyń esimi ázirge aıtylmaıdy.
Zańǵa sáıkes, jábirlenýshiniń ólimine ákep soqqan ne qylmystyq top jasaǵan is-áreketter úshin segiz jyldan on eki jylǵa deıingi merzimge bas bostandyǵynan aıyrý jazasy qarastyrylǵan.
