Qostanaılyq stýdentter jeńildetilgen jolaqy engizýdi suraıdy
QOSTANAI. QazAqparat - Qostanaılyq jastar qalada stýdenttik jolaqy bıletin engizýdi surap otyr. Bul týraly «Jas Otan» Jastar qanatynda ótken basqosýda málim boldy, dep habarlaıdy QazAqparat.
Jıynǵa kelgen stýdentter jolaqynyń qymbattaýyn tilge tıek etti. Al «Jas Otan» JQ oblystyq fılıalynyń tóraǵasy Erlan Tóletaevtyń sózinshe, avtobýsta júrý quny stýdentter úshin 80 teńge bolyp qalýy tıis.
«Qazirdiń ózinde stýdentterge oqý ornyna baryp kelý úshin keminde 160 teńge ketedi. Bul bir aıǵa shaqqanda 14 myńǵa teń. Memlekettik grantta oqıtyndar aıyna orta eseppen 16 myń teńge alady desek, basqa da shyǵyndarǵa nebári 2000 teńge artylady. Men Qazaqstannyń barlyq óńirindegi jolaqy qunyn qarap kórdim. Eń qymbaty - Qostanaıda. Sondyqtan stýdentterge jeńildikterdi qarastyrý kerek»,- deıdi ol.
Jastar jaǵy jolaqy qunymen qatar avtobýstardyń qyzmet kórsetý sapasyn da synǵa aldy. Máselen, KSK shaǵyn aýdanynda turatyn Nazıgúl Dosmaǵulova №9 avtobýstyń jumysyna kóńili tolmaıtynyn aıtady.
«KSK shaǵyn aýdanyna bes aı buryn otbasymyzben kóship keldik. Ǵafý Qaıyrbekov kóshesinen úsh avtobýs júredi. Baratyn jerime №9 avtobýspen jetemin. Alaıda, atalǵan marshrýttyń jumysy kóńilimnen shyqpady. Avtobýs jıi keshigedi. Aıaldamada 20 mınýtqa deıin turamyn. Ásirese, qysta qıyn. Birde aıazdy kúni avtobýstyń artqy esigi jabylmaı qıǵylyq saldy. Іshtegi jolaýshylar tońyp-jaýrap mejeli jerge áreń jetti. Avtobýstyń júrisin, tehnıkalyq jaǵdaıyn qadaǵalap otyratyn jaýapty adamdar bolý kerek»,- dep bazynasyn aıtty Nazıgúl Dosmaǵulova.
Aıta ketý kerek, kúni keshe ǵana stýdentter men túrli uıymdardyń ókilderi petıtsııaǵa qol qoıýdy bastady. Olar atalǵan qujatta Qostanaı qalasynyń ákimi Bazyl Jaqypovtan qoǵamdyq kólikterge stýdenttik bılet engizýdi suraıdy.
«Osy petıtsııaǵa qazirdiń ózinde 2000-daı stýdent qol qoıdy. Bul tizim kóbeıeri sózsiz. Bılik ókilderi jastardyń ótinishin esepke alady degen oıdamyz», - deıdi Aıanat Meńdibaeva esimdi stýdent.
Eske salsaq, aqpan aıynan bastap Qostanaıda qoǵamdyq kólik aqysy 100 teńgege deıin qymbattaıdy. Sebebi, tasymaldaýshy kompanııalar qala ákimdigine tarıfti kóterý týraly birneshe ret usynys jasaǵan. Olardyń aıtýynsha, qoǵamdyq kólikterdegi qalypty baǵa 125 teńge bolýy tıis.
Osy tusta avtobýs júrgizýshileri de ózderiniń oıyn ortaǵa saldy.
«Tarıfti kóterýge jaǵarmaı men qosalqy bólshekter baǵasynyń ózgerýi basty sebep. Qazir barlyǵy qymbattap ketkenin bilesizder. Onyń ishinde janar-jaǵarmaıdyń, akkýmýlıatorlar men qosalqy bólshekterdiń baǵasy da bir ornynda turǵan joq. Bir jaǵynan, tehnıkalardy jańartý úshin jolaqyny qymbattatýǵa májbúrmiz», - dedi №38 avtobýstyń júrgizýshisi Andreı Bogdan.
