Qostanaılyq stýdentter emtıhandy qansha teńgege tapsyrady
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamenti janynan qurylǵan «Qostanaı - adaldyq alańy» jobalyq keńsesi arnaıy saraptama júrgizip otyrady. Bul joly mamandar bilim salasyndaǵy sybaılas jemqorlyq taqyrybynda saýalnama júrgizdi. Saýalnamaǵa oblystyń JOO stýdentteri qatysty.
«Bul saýalnama oqý ornyndaǵy professorlar men oqytýshylar quramynyń jumys deńgeıin zertteý jáne sybaılas jemqorlyq núktelerin anyqtaý maqsatynda júrgizildi. «Qostanaı - adaldyq alańy» jobalyq keńsesiniń menedjerleri túrli fakýltetterde oqıtyn 1200 stýdentti qatystyrdy», - delingen departamenttiń baspasóz habarlamasynda.
Respondentterdiń baǵalaýy boıynsha, joǵary bilim berý júıesindegi sybaılas jemqorlyq deńgeıi aıtarlyqtaı joǵary. Máselen, saýalnamaǵa qatysqandardyń 22% JOO-da sybaılas jemqorlyq faktileri bar dep esepteıdi. Al sýdentterdiń deni oqytýshylardyń para alýyna olardyń tómengi jalaqysy sebep dep esepteıdi.
«Stýdentterdiń oqytýshylar quramy tarapynan qysym kórsetý bolmasa da, sessııa kezinde aqsha suraıtynyn aıtady. Stýdentterge «Qansha soma kóleminde para berdińiz?» degen suraq qoıyldy. 35 bilim alýshy sessııa kezinde 5000 teńge, 6 stýdent 5-10 teńge aralyǵynda para bergen. Al 19 stýdent 20-30 myń aralyǵynda aqsha berip, baǵa qoıdyrǵan», - dep atap ótti vedomstvonyń baspasóz qyzmetindegiler.
Stýdentterge joǵary oqý oryndarynda sybaılas jemqorlyqtyń aldyn alý úshin eń tıimdi sharalar usynyldy. Aıta keteıik, jobalyq keńse qyzmetkerleri mundaı saýalnamalardy sessııa jáne emtıhan ýaqyttarynda turaqty túrde ótkizip turady.