Qostanaılyq sportshylar aı saıyn aqshalaı tólem alady
QOSTANAI. QazAqparat - 2017 jyly oblys boıynsha 8500-ge jýyq sporttyq is shara ótken. Bul týraly oblystyq ákimdikte ótken jıynda dene shynyqtyrý jáne sport basqarmasynyń basshysy Evgenıı Vılıams málimdedi, dep habarlaıdy QazAqparat.
2017 jylǵy málimet boıynsha, oblystaǵy 260786 adam buqaralyq sportpen aınalysady. Bul kórsetkish aldyńǵy jylmen salystyrǵanda aıtarlyqtaı joǵary.
«Jankeldın aýdany turǵyndarynyń 47,4%-y sportpen shuǵyldanady. Al Naýyrzym aýdanynda osy kórsetkish 44,5%-ǵa teń. Oblys boıynsha 8500-ge jýyq sporttyq shara ótse, oǵan qatysqandardyń sany 542,8 myńǵa jetti. Bizde buryn sońdy mundaı kórsetkish bolmaǵan edi. Óńirdegi buqaralyq sporttyń damýyna sport mamandarynyń, bapkerlerdiń kóbeıýi áser etti. Aýyldyq jerlerge byltyrdan bastap 333 sport ádiskeri tartyldy. Bıyl taǵy 18 shtat ashylmaq», - dedi Evgenıı Vılıams.
Basqarma basshysynyń sózine súıensek, 2017 jyly oblysta 13 halyqaralyq dárejedegi sport sheberi, 59 Qazaqstannyń sport sheberi daıyndyqtan ótti. Buǵan qosa 20 bapker joǵarǵy biliktilik sheberligin qorǵady.
«2018 jyldan bastap el quramasynda óner kórsetetin Qostanaı oblysynyń sportshylaryna aqshalaı syıaqy taǵaıyndaldy. Olımpıadalyq sport túrleri boıynsha synǵa túsip júrgen sportshylar aı saıyn 88,4 myń teńge alady. Al sporttyń basqa túrlerinen halyqaralyq jarystarǵa qatysatyndarǵa 79,6 myń teńge beriledi», - dedi Evgenıı Vılıams.
Jıyndy qorytyndylaǵan oblys ákimi Arhımed Muhambetov sporttyq sharalardy kóptep ótkizýdi tapsyrdy.
«Mendegi bar derek boıynsha, 2017 jyly oblys turǵyndarynyń 29,7%-y buqaralyq sportpen aınalysty. Jaman nátıje emes. Biraq, jekeleı alǵanda tómen kórsetkishter de bar. Mysaly, byltyr Qamysty aýdanynda 49 sporttyq saıys ótken. Qostanaı aýdany nebári 10-ǵa jýyq shara uıymdastyrǵan. Bul aýdandyq sport bólimderiniń jumysyn kórsetedi. Osy jyly kemshilikterdiń ornyn toltyryńyzdar», - dedi óńir basshysy.
