Qostanaılyq sportshy MMA-den álem chempıonatynda altyn medal aldy

QOSTANAI. QazAqparat – Qostanaılyq Shyńǵys Júsipov 17-20 tamyz aralyǵynda Abý-Dabıde ótken MMA-den álem chempıonatynda altyn medal aldy, dep habarlaıdy QazAqparat tilshisi.

Júsipovtiń bapkeri Marat Álipbaev sportshysynyń jeńisi týraly Instagram paraqshasynda jazdy.

«Elimizdiń ánuranyn shyrqatyp, Qazaqstannyń týyn jelbiretti. Qazaqstandyq MMA, Shyńǵys Júsipov jáne men úshin tarıhı sát! MMA-den álem chempıonatynyń alǵashqy altyn medali»,- dep qýanyshty jańalyqty jetkizdi bapker.

Shyńǵys Júsipov jasóspirimder arasynda birinshi oryn aldy. Chempıonatta álemniń 20 elinen 28 qarsylas baq synady. Shyńǵys alty jekpe-jek ótkizip, beseýin merziminen buryn aıaqtady.

Shyńǵys ózi de áleýmettik jelilerde jeńisi týraly aıtty.

Belgili bolǵandaı, «altynǵa» jetý joly ońaı bolǵan joq, tipti sportshy chempıonatqa keshigip qala da jazdaǵan.

«Bul jarysqa úlken kúsh jumsaldy. 13 tamyzda Almatyǵa jattyqtyrýshymen ushyp, aman-esen qonyp, jarysqa barý úshin kelesi kúndi kúttik. 14 tamyzda ushýymyz kerek bolǵan edi. Bıletter burynnan satyp alynǵan. Endi bıletterdi alý kezegi bizge kelgende, kenet belgisiz sebeptermen olar reısten alynyp tastalǵany belgili boldy. Men sol sátte qatty ýaıymdadym», - dep atap ótti Shyńǵys Júsipov.

Biraq bapker Álippaev onyń sheshimin birden tapqan. Sportshy men jattyqtyrýshy Nur-Sultanǵa ushyp, sol jerden BAÁ-ge ushatyn reıske jetip úlgergen.

«Ushýym úshin bárin jasaǵan bapkerime alǵysym sheksiz. Óte myqty qoldaý úshin meniń komandama raqmet», - dep túıindedi sportshy.