Qostanaılyq sportshy 35 jyl boıy saqtalǵan rekordty jańartty
QOSTANAI. QazAqparat - Qostanaılyq Tatıana Neroznak jeńil atletıkadan Óskemende ótken Qazaqstan Respýblıkasynyń chempıonatynda top jardy, dep habarlaıdy QazAqparat.
Jeńil atletıkadan 2018 jylǵy el birinshiligi Óskemendegi Olımpıada chempıony Olga Rypakova atyndaǵy jabyq keshende bastaldy. Jarystyń birinshi kúni 1 500 metrge júgirýden Qazaqstannyń sport sheberi, qostanaılyq Tatıana Neroznak aldyna jan salmady. Ol atalǵan qashyqtyqty 4 mınýt 20,28 sekýndta júgirip ótken. Sondaı-aq, Neroznak 3 000 metrge júgirýden de birinshi kelip, 1983 jyldan beri saqtalyp kele jatqan el rekordyn jańartty. Rekordshynyń kórsetkishi - 9 mınýt 17,94 sekýnd. Sportshynyń jattyqtyrýshysy Tókesh Ibraevtyń aıtýynsha, bul jetistik - talaı jylǵy daıyndyqtyń jemisi.
«Eldiń basty týrnırine tyńǵylyqty daıyndaldyq. Bastysy, Tatıana el chempıonatynda buryn esesi ketip júrgen qarsylastarynyń aldyn orap ketti. Bir jaǵynan, ol ataqty qaraǵandylyq jelaıaq Valentına Shateıkoǵa tıesili bolǵan rekordty jańartty. Endi biz 1-3 aqpan aralyǵynda Irannyń Tegeran qalasynda ótetin Azııa chempıonatyna qatysamyz», - dedi jeńil atletshiniń bapkeri agenttik tilshisine.
Aıta keteıik, elimizdiń 5 jeńil atleti 2018 jyldyń alǵashqy aıyndaǵy álemdik reıtıngte úzdik 15 sportshynyń qatarynda tur. IAAF túzgen reıtıngte qazaqstandyq sportshylar arasynda qostanaılyq Tatıana Neroznak segizinshi satyda ornalasqan.
