Qostanaılyq soǵys ardageriniń jambasynan 73 jyl saqtalǵan oq alyndy
ASTANA. QazAqparat - 92 jastaǵy qostanaılyq soǵys ardageri Baltabaı Qazıevke ota jasalyp, denesinde 73 jyl boıy saqtalǵan oq alyndy, dep jazady «Qostanaı jańalyqtary» gazeti.
18 jasynda Baltabaı Qazıev Amangeldi aýylynan maıdanǵa shaqyryldy. Avtomatshy bolǵan ol kóbinese Ýkraınadaǵy urystarǵa qatysty. 1943 jyldyń 6 qarashasynda Kıevtiń azat etilgendigin áli kúnge deıin qýanyshpen eske alady. Azapty basqynshylyq aıaqtaldy, 778 kún ishinde Gıtler áskeri júz myńdaǵan qala turǵyndaryn atyp, asyp, gaz kameralarynda tunshyqtyryp óltirdi.
Baltabaı Qazıev - Qyzyl juldyz jáne «Jaýyngerlik erligi úshin», 1944 jyly «Erligi úshin» medaldarymen marapattaldy. Alaıda bul ýaqytta ol aýrýhanada jatty. Jaq súıegi jaraqattanǵandyqtan sóılese almady, qoldary qımyldamady. Dárigerler úsh jyl boıy alysyp, aqyry «múmkindigi joqtar» oqshaýlaǵyshyna aýystyrdy. Alaıda ol aman qalyp, 1947 jyldyń sońynda aýrýhanadan shyqty. Úıine ІІ toptaǵy múgedek bolyp oralǵanymen, bilim alyp, kolhoz tóraǵasy, Qamysty jáne Qarasý aýdandarynyń bas zootehnıgi bolyp qyzmet atqardy.
«Tutas ómirim ótti, kenetten boıymdaǵy oq biline bastady, - deıdi maıdanger.
Maıdan dárigerleri kezinde jeti oqtyń bireýin ala almaǵan. Neshe oqtyń alynǵandyǵyn ardagerdiń denesindegi, bilegindegi, ıegindegi, ishi men aıaǵyndaǵy tyrtyqtardan sanap bilýge bolady. Onyń jambasynda qalyp qoıǵan oq iriń aýrýyna ulasqan. Ota Astanada jasalyp, elorda dárigerlerin tańqaldyrǵan ol úıine alǵys arqalap oraldy. Ardager emin Qostanaı qalalyq emhanasynda jalǵastyryp, sondaǵy dárigerlerdiń baqylaýyna alyndy. Boıynda 73 jyl boıy saqtalǵan oqty hırýrg dárigerler Baltabaı Qazıevke estelikke berdi.
