Qostanaılyq sheneýnik áriptesterinen dıplomyna «kórimdik» talap etken
QOSTANAI. QazAqparat - QR AShM Veterınarlyq baqylaý jáne qadaǵalaý komıteti qalalyq ınspektsııasynyń basshysy Arman Janzaqov pen oǵan baǵynyshty qyzmetkerlerge qatysty is Qostanaıdyń ádep keńesinde qaraldy. Bul týraly QazAqparat Memlekettik qyzmet isteri jáne sybaılas jemqorlyqqa qarsy is-qımyl agenttigi oblystyq departameniń baspasóz qyzmetine silteme jasap habarlaıdy.
Ádep jónindegi keńestiń hatshylyǵy Sybaılas jemqorlyqqa qarsy qyzmettiń materıaldary boıynsha memlekettik qyzmetke nuqsan keltiretin faktini talqylady. Atap aıtqanda, Qostanaı qalalyq veterınarlyq komıtettiń basshysy A.Janzaqov «Aıan-Ozat» JShS ókili N.Gandzıı, jeke kásipkerler V.Vardanıan jáne E. Derııden aqsha alǵany, sondaı-aq, jumys ornynda áriptesterimen ishimdik ishkeni úshin qyzmet ádebin buzǵan. Buǵan qosa ol qyzmettik kólikti jeke maqsattaryna paıdalanyp, ózine baǵynyshty qyzmetkerlerge óziniń jańa dıplomyn kórsetip, sol úshin aqsha talap etken.
Beınematerıaldarda belgili bolǵandaı, A.Janzaqov ulynyń úılengenin toılaý úshin jumys ornynda otyrys jasaǵan.
Sheneýnik pen onyń áriptesteri bul faktini joqqa shyǵarmady, alaıda A.Janzaqov kásipkerlerden aqsha alǵanyn moıyndaǵan joq.
Etıkalyq keńestiń músheleri Arman Janzaqovty qyzmetten bosatýdy usyndy. Qalǵan qyzmetkerlerge qatań sógis túrinde tártiptik jaza qoldanylady.
