Qostanaılyq sharýalar janar-jaǵarmaı baǵasyn tómendetýdi usynbaq
QOSTANAI. QazAqparat - Qostanaılyq sharýalar jınaǵan astyqtaryn naryqtyq baǵamen ótkize almaýda. Buǵan janar-jaǵarmaı baǵasynyń qymbattap ketkeni sebep, dep habarlaıdy QazAqparat tilshisi «Qazaqstan fermerler odaǵy» oblystyq fılıalynyń tóraǵasy Vladımır Dranchýkke silteme jasap.
Búgingi kúni sharýalar úshin basty problemanyń biri astyqtyń naryqtaǵy baǵamen ótpeı turǵany bolyp otyr. Tipti, Qostanaıdaǵy áleýetti degen kásiporyndar 3-sanatty bıdaıdyń tonnasyn 35 myń teńgege sata alar emes. «Qazaqstan fermerler odaǵy» oblystyq fılıalynyń tóraǵasy Vladımır Dranchýktyń aıtýynsha, buǵan birinshi kezekte janar-jaǵarmaı baǵasynyń qymbattaýy áser etedi.
«Búginde astyqtyń túsimi men jumsalǵan janarmaı baǵasyna ketken shyǵyndy salystyrýǵa kelmeıdi. Suıyq otyn jyl saıyn qymbattaýda. Aldaǵy egis ýaqytynda janar-jaǵarmaı baǵasy lıtrine 150 teńge bolady dep kútilýde. Osydan úsh-tórt jyl buryn 100 teńgege de jetpese, byltyr 137 teńge boldy. Mine, sol sebepti sharýalar ózderiniń kásibin dóńgelete almaı otyr. Endi aýylsharýashylyq taýar óndirýshileri úshin janar-jaǵarmaı baǵasyn tómendetýge barynsha kúsh salamyz. 22 aqpanda Aýyl sharýashylyǵy mınıstrliiginde ótetin jıynda osy máseleni kóteremiz. Usynystarymyzdy jazyp qoıdyq», - dep túsindirdi Dranchýk.
Jalpy, byltyr oblys boıynsha 342 mlrd teńgeniń aýylsharýashylyq ónimderi óndirilgen. Bul 2016 jylmen salystyrǵanda 7%-ǵa artyq. Elimiz boıynsha barlyǵy 21 mln tonna astyq jınalsa, sonyń 5,2 mln tonnasy Tobyl óńiri sharýalarynyń úlesinde. Sonymen qatar, 125 egin oratyn tehnıka satyp alynǵan. Sońǵy bes jyl ishinde barlyǵy 65 mlrd teńgege 5 myńnan astam tehnıka ákelingen.
