Qostanaılyq sharýalar tuńǵysh ret jasyl qaraqumyqty naryqqa shyǵarmaq
QOSTANAI. QazAqparat - Qostanaı oblysynda joǵary surypty qaraqumyq jarmasyn óndirý tsehynyń qurylysy kelesi jyly aıaqtalady, dep habarlaıdy QazAqparat tilshisi.
Qostanaı oblysynyń ákimi Arhımed Muxambetov Qarabalyq aýdanyna jumys saparymen baryp, aýyl sharýashylyǵy nysandarynyń jaı-kúıimen tanysty. Solardyń biri - Toǵyzaq aýylyndaǵy joǵary surypty qaraqumyq óndirisi tsehy. Belgili bolǵandaı, qurylys jumystary 2019 jyly aıaqtalyp, paıdalanýǵa beriledi. Jalpy, joba quny - 670 mln teńge. Nátıjesinde 28 turaqty jumys orny ashylady. Tseh dırektory Gúlza Sársekeevanyń sózinshe, qurylǵylar ýkraınalyq «Agro-Sımo-Mashbýd» ǵylymı-óndiristik birlestigi men «OLIS» qoǵamdyq uıymynan alynady. Qostanaıǵa 3 aıdan soń jetkiziledi. Osy maqsatta 400 mln teńge jumsalmaq. Tıisinshe Arhımed Muhambetov qurylys-montajdaý jumystaryn tııanaqty júrgizýdi tapsyrdy.
«Bul ınvestıtsııalyq joba 2015 jyly qolǵa alyndy. Qurylys qarqyny birqalypty júrip jatyr. Biraq, tsehty 2019 jyly iske qosyńyzdar. Bıyl aıaqtap úlgire almaısyzdar. Asyǵystyq tanytýdyń qajeti joq. Keıin bir olqylyǵy tabylýy múmkin. Tseh jylyna 2000 tonna joǵary surypty qaraqumyq jarmasyn óndirýge qaýqarly. Sondyqtan joba júıeli túrde júzege asýy tıis. Jumys barysyn qadaǵalaýdy oblystyq kásipkerlik jáne ındýstrııalyq-ınnovatsııalyq damý basqarmasyna tapsyramyn», - dedi óńir basshysy.
Joǵary surypty qaraqumyq jarmasyn óndiretin tseh sheteldik naryqqa shyǵýǵa múmkindik beredi. Sebebi, munda jasyl qaraqumyq óndiriledi. Mamandardyń aıtýynsha, jasyl qaraqumyq shetelge birinshi ret eksporttalmaq. Sondaı-aq, qaraqumyqtyń bul túri eń paıdaly dándi daqyldar sanatyna kiredi. Ásirese, Japonııa, Ýkraına elderinde suranys mol.
Eske salsaq,byltyr Qostanaıdaǵy «Mıbeko» JShS oblysta tuńǵysh ret qaraqumyq óńdeý tsehyn ashty. Atalǵan nysan táýligine 55 tonna qaraqumyqty óńdeıdi. Munda gollandııalyq, reseılik jáne qytaılyq qural-jabdyqtar qoldanylady.
