Qostanaılyq sharýalar pandemııaǵa qaramastan jyldyq jospardy oryndady – ákimdik
Aýyl sharýashylyǵy jáne jer qatynastary basqarmasynyń basshysy Tımýr Bısımbaevtyń aıtýynsha, Qostanaı oblysynda 121 myń adam aýyl sharýashylyǵymen aınalysady. Barlyǵy 7,6 myń aýyl sharýashylyǵy nysany jumys isteıdi. Jyl basynan beri olar 559,2 mlrd teńgeniniń ónimin shyǵarǵan.
«Oblystyń agrarlyq salasyndaǵy mindetterdi tolyq oryndaýǵa memlekettik qarjylyq qoldaýy tikeleı áser etedi. Bıyl respýblıkalyq jáne jergilikti bıýdjetterden qarjylandyrýdyń eń kóp somasy bólindi. 41,2 mlrd teńge sýbsıdııalar men bıýdjettik kredıtterge baǵyttaldy. Qostanaı oblysynda kóktemgi egis jáne egin jınaý jumystaryn júrgizýge 29,4 mlrd teńge nesıe qarajaty berildi. Sharýalar pandemııaǵa qaramastan jyldyq jospardy oryndady. Osy jyly bizdiń oblys respýblıkada ıgerilgen ınvestıtsııalyq sýbsıdııalar boıynsha kóshbasshy orynǵa shyqty. 13 mlrd teńge bólinip, 2621 ótinim sýbsıdııalandy, mıneraldy tyńaıtqyshtardy engizý kólemi artty. Nátıjesinde negizgi kapıtalǵa 49,5 mlrd teńge ınvestıtsııa tústi», - deıdi basqarma basshysy.
Aýyl sharýashylyǵy basqarmasy aýdan ákimdikterimen birlesip, 2021 jylǵy egis alqaptaryn ártaraptandyrý boıynsha jumys júrgizýde. Oblys ákimi Arhımed Muhambetov jerdi utymdy paıdalanýdy tapsyrdy. Sonymen qatar áleýmettik mańyzy bar azyq-túlik taýarlaryn azaıtpaý máselesi kún tártibinen túspeýi tıis. Atap aıtqanda, oblys sharýalary qaraqumyq, kúnbaǵys maıy, kartop jáne kókónister ósirý úshin arnaıy alqaptarǵa ıe bolady. Alańdardy bólýdi aýyl sharýashylyǵy basqarmasy iske asyrady.
