Qostanaılyq sharýalar maldyń jaı-kúıin «onlaın» júıede baqylap otyratyn bolady
Qostanaı oblysynda «aqyldy» júıeler sút jáne et fermalarynda, qus fırmalary, kondıterlik fabrıkalarda qoldanylady. Osy rette jergilikti sharýalar sheteldik áriptesterimen tájirıbe almasatyn bolady. Sol sebepti astyqty aımaqqa Azııa damý bankiniń Qazaqstandaǵy ókildiginiń dırektory Djovannı Kapannelı bastaǵan bir top delegat keldi. Olardyń arasynda aýyl sharýashylyǵy salasynda zertteý jumystaryn júrgizip júrgen Mıchıgan memlekettik ýnıversıtetiniń (AQSh) professory Chen Djıkýan, ІNE ınstıtýtynyń (Nıderlandy) professory Vım Bastıaanssen sııaqty ǵalymdar bar. Meımandar aldymen Qostanaı aýdanynda ornalasqan «Sadchıkovskoe» JShS bazasyna bardy. Atalǵan seriktestik bıyl «Aqyldy sút fermasy» jobasyn qolǵa alǵan bolatyn.
«Biz 2013 jyldan bastap ashytylǵan sút ónimderin óndirýmen aınalysyp kelemiz. Sút tsehy bir kúnde 15000 lıtrge deıin sút ónimderin shyǵarady. Germanııadan NARTMANN qurylǵysyn aldyryp, ónimdilikti arttyrdyq. Endi bıyl sharýashylyqty tolyqtaı tsıfrlandyrý júıesimen qamtamasyz etemiz. Aldaǵy ýaqytta «Smakstek» qurylǵysy satyp alynady. Bul arqyly árbir iri qara maldyń (ІQM) jaı-kúıin «onlaın» rejımde baqylaýǵa múmkindik beredi. Arnaıy dabyl belgisi arqyly janýardyń temperatýrasy, qozǵalys belsendiligi týraly málimet túsip otyrady. Dál sol sátte sıyrǵa qajetti jem-shóp, sýdyń kólemi ekranǵa shyǵady», - dep túsindirdi «Sadchıkovskoe» JShS dırektory Sergeı Fıtsner.
«Smakstek» qurylǵysy aldaǵy 3 aıda 30-40 analyq ІQM engiziledi. Eger ońdy nátıjege qol jetip jatsa, qurylǵyny 1000 analyq basqa qondyrý josparda bar.