Qostanaılyq sharýalar eksport kólemin 24%-ǵa ósirdi
QOSTANAI. QazAqparat - Qostanaı oblysynyń ákimi Arhımed Muhambetov aýyl sharýashylyǵy salasynda ozyq jetistikke jetken sharýalardy marapattady, dep habarlaıdy QazAqparat tilshisi.
Egis naýqany aıaqtalǵan soń aýylsharýashylyq jáne qaıta óńdeý ónerkásibi qyzmetkerleriniń merekesi atap ótiledi. Bul shara Qostanaıda da jalǵasyn tapty. Jylaıryqtaǵy jıynǵa Qostanaı oblysyndaǵy aýdan-qalalardyń ákimderi, eńbek ardagerleri qatysty. Aldymen, oblys ákiminiń birinshi orynbasary Ǵaýez Nurmuhambetov baıandama jasady.
«Oblystyń agroónerkásip keshenin damytýǵa aýyl sharýashylyǵy qurylymdar, fermerlik sharýashylyqtar, servıstik jáne qaıta óńdeýshi kásiporyndardaǵy mehanızatorlar men mal ósirýshiler atsalysty. Osy jylǵy dala jumystary ońaıǵa túsken joq. Bir jaǵynan, dıqandarǵa aýa raıynyń qubylmaly bolýy kedergi jasady. Tabıǵattyń tosyn minez tanytqanyna qaramastan qostanaılyq sharýalar mol ónim aldy. Barlyǵy 5,2 mln tonna astyq qambaǵa quıyldy. Byltyrǵy jylmen salystyrǵanda qaıta óńdeý ónerkásibi ónimderi 1,5 mlrd teńgege artyq satyldy. Osylaısha, óńirdiń jalpy ishki óniminde aýyl sharýashylyǵynyń úlesi 12 paıyzǵa artty», - dedi Ǵaýez Nurmuhambetov.
Qostanaıda 358 myń tonna sút, 74 myń tonna et, 492 mln dana jumyrtqa óndirildi. Buǵan qosa óndiris sektorynda ósim baıqalady. Bıyl mal sharýashylyǵymen aınalysatyn 1294 avgrofırma tirkeldi. Ǵaýez Nurmuhambetov aıtqandaı, oblysta qaıta óńdeý ónerkásibi salasynda 6 ınvestıtsııalyq joba júzege asty. Osy maqsatta 7 mlrd teńgeden astam qarajat jumsaldy.
«Aýyl sharýashylyǵynda joǵary nátıjeli jumystar eńbek ónimdiliginiń artýyna septigin tıgizdi. 2018 jyly bul kórsetkish 44%-ǵa ósti. Sonymen qatar syrtqy naryqqa shyǵarylǵan ónim kólemi 275 mln AQSh dollaryn qurady. Bul byltyrǵy jyldaǵydan 24%-ǵa kóp. Bul buryn- sońdy bolmaǵan jetistik», - dedi oblys ákiminiń orynbasary.
Saltanatty jıyn barysynda óńir basshysy Arhımed Muhambetov bir top aýylsharýashylyq mamandaryna «Eńbek ardageri» medalin tapsyrdy. Olardyń arasynda Quzybaı Omarov, Vasılıı Kýts, Edýard Shýller bar. Al uzaq jyl aýyl sharýashylyǵy salasyna súbeli úles qosqan Sábıt Aǵaıdarov, Ádil Samatov, Aleksandr Klımko, Vladımır Býshkın syndy azamattar «Qurmetti ardager» tósbelgisimen marapattaldy. Al tájirıbeli sharýalar Uzaqbaı Aǵaıdarov, Vladımır Chernenko, Muhamedjan Akýlov, Áljan Qabıevter «QR aýyl sharýashylyǵy salasynyń úzdigi» tósbelgisin taǵyndy.
Merekelik jıyn sońy oblys óner sheberleriniń kontsertimen jalǵasty.
