Qostanaılyq seriktestik topyraq ylǵalyn saqtaıtyn tehnıka qurastyrady
QOSTANAI. QazAqparat - QR Parlamenti Májilisiniń depýtattary Gúlnár Bıjanova men Murat Temirjanov Qostanaı oblysyna jumys sapary aıasynda Lısakov qalasynda boldy, dep habarlaıdy QazAqparat.
Halyq qalaýlary aldymen jergilikti «SpetsStalKonstrýktsııa» seriktestiginde bolyp, nysannyń jumysymen tanysyp, qyzmetkerlerimen kezdesti. Aıta ketý kerek, bul mekeme temir bólikterinen túrli ónimder shyǵarady. Ári suranysqa ıe. Kásiporynnyń qýaty - 1200 tonna tenttik qańqalyq angarlar óndiretin tseh 2015 jyly jandandyrý sharalarynan ótken. Indýstrııalandyrý kartasyna Lısakov shaharynan engen sanaýly jobanyń biri. 
Munan soń depýtattar «Don-Mar» seriktestigine bas suqty. Bul - aýylsharýashylyq tehnıkasy, destelegishterdiń túr-túrin shyǵaratyn el boıynsha jalǵyz kásiporyn.
«Ýaqyt óte amerıkalyq, eýropalyq tehnıkalardyń bizdiń dalanyń jaǵdaıyna asa yńǵaıly emes tustaryn baıqadyq. Qýatty bolǵanymen, astyqtyń sabanyn shashyp tastaıdy. Sondyqtan sheteldik kombaındardyń barlyǵy birdeı egini men mal sharýashylyǵy qatar júretin qazaq dalasyna tıimdi dep aıtýǵa kelmeıdi. Bizdiń «Don Mar» zaýyty shyǵarǵan dán sebý kesheni óte tıimdiligi jaǵynan sheteldik tehnıkalardan kem emes. Óıtkeni ol Qazaqstannyń qaı aımaǵyndaǵy egis alqaptarynda da kóktemde ylǵal jetispeıtinin eskere otyryp jetildirilgen. Shetelden alynǵan dán sebý keshenderiniń tabany ylǵaly az topyraqty odan saıyn keptirip jiberedi. Al «Don Mar» shyǵarǵan dán sebý kesheni topyraqtyń ylǵalyn 20 paıyzdan artyq keptirmeıdi», - deıdi kásiporyn basshylary.
Májilis depýtattary seriktestiktiń atqaryp jatqan jumysyna oń baǵasyn berdi. Bılik tarapynan bıznes salasyna kórsetilip jatqan járdem mol ekendigin aıtty.
«Elbasynyń XVIII Sezde aıqyndap bergen bastamalaryn júzege asyrý - basty maqsatymyz. Ár partııalyq joba - áleýmettiń áleýetin áldendirip, halyqtyń ál-aýqatyn arttyrýǵa baǵyttalǵan», - dedi depýtat Gúlnár Bıjanova.
