Qostanaılyq polıtseıler júregi ustap qalǵan reseılik azamatty qutqardy
QOSTANAI. QazAqparat - Rýdnyı qalasynyń Іshki ister basqarmasynyń Jergilikti polıtsııasynyń qyzmetkerleri Maqsut Dosybaev pen Ramzan Tımýhaev kósheniń ortasyda júrek talmasy ustap qalǵan máskeýlik azamatqa shuǵyl túrde kómek kórsetken, dep habarlaıdy QazAqparat tilshisi Qostanaı oblystyq Іshki ister departamentiniń baspasóz qyzmetine silteme jasap.
Jergilikti polıtseıler Parkovaıa kóshesindegi kezekshilik kezinde aıaq astynan jerge qulaǵan azamatty baıqaǵan. Tártip saqshylary er adamnyń janyna jyldam jetip, alǵashqy medıtsınalyq kómekti kórsetip úlgergen.
«Er adamnyń oń jaq denesi uıyp, ózdiginen qozǵala almaı qalǵan. Jedel járdemdi kútpeı, naýqasty dereý aýrýhanaǵa jetkizý qajet dep sheshtik. Biz úshin bir mınýt ta mańyzdy ekenin túsindik», - dep eske alady Jol-patrýldik polıtsııasy rota vzvodynyń komandıri Maqsut Dosybaev.
Naýqas aýrýhanaǵa jetkizilgennen keıin aldymen ınsýlt, keıin ınfarkt alǵany belgili boldy. Qazirgi ýaqytta er adam Rýdnyı qalasyndaǵy aýrýhananyń jansaqtaý bóliminde jatyr.
«Jyldam áreket etýge tyrystyq, sol sebepti esh alańdaǵan joqpyn. Polıtsııa qyzmetkeri kez kelgen ýaqytta kómek qolyn sozýǵa ázir bolýy kerek. Sondyqtan medıtsınaǵa qyzmetimizdiń ajyramas bólshegi retinde qaraımyz», - dedi Ramzan Tımýhaev.
Naýqastyń týystary ІІD basshysy, polıtsııa general-maıory Beket Aımaǵambetovtiń atyna alǵys hat jazdy. Onda polıtsııa qyzmetkerleriniń kórsetken kómekteri úshin zor rızashylyq bildiretinderin jetkizdi.
