Qostanaılyq polıtseıler janyp jatqan júk kóligin sóndirdi
QOSTANAI. QazAqparat - Qostanaı oblystyq ІІD qyzmetkerleri jol ústinde otqa oranǵan júk kóligin sóndirdi, dep habarlaıdy QazAqparat oblystyq ІІD baspasóz qyzmetine silteme jasap.
Qyrǵyzstan Respýblıkasy Bishkek qalasynyń turǵyny Tashpolat Hasanov Qostanaı oblysy ІІD-niń baspasóz qyzmetine habarlasty. Ondaǵy maqsaty - ózin keleńsizdikten qutqarǵan jol-patrýldik polıtsııasy batalonynyń qyzmetkerleri aǵa serjanttar Berik Baıkenov pen Arman Jolmaǵambetovke alǵysyn bildirý.
Belgili bolǵandaı, Qostanaı-Áýlıekól-Surǵan tasjolynda qyrǵyzstandyq Tashpolat Hasanov tizgindegen júk kóligi tirkemesiniń artqy dóńgelegi órtengen. Abyroı bolǵanda bir baǵytta joldary túıisken polıtseıler otqa orana bastaǵan tirkemeni sóndirýge kirisken.
«Eger polıtseıler bolmaǵanda munyń bári qalaı aıaqtalaryn kim bilsin. Jaqyn mańaıda eldi meken bolǵan joq, tek sizderdiń jigitterińiz kómektesti. Men bul elden emespin, sondyqtan qandaı da bir járdem shaqyrýǵa telefonym jeli aýlamaıdy», - deıdi kólik júrgizýshisi.
Tártip saqshylary órt shalǵan fýrany kóre salysymen tas joldaǵy qozǵalysqa ýaqytsha shekteý qoıǵan. Ótken-ketken kólik júrgizýshilerinen qosymsha órt sóndirgishter alyp, sonyń arqasynda tilsiz jaýdy tumshalaý múmkin boldy. Júrgizýshiler de órtpen arpalysqan polıtseılerge kómektesken. Tártip saqshylary qyrǵyzstandyqtyń kóliginiń dóńgelegin aýystyrýǵa da járdem kórsetipti. Berik pen Arman mundaı jaǵdaıǵa birinshi ret tap bolǵanyn aıtty. Al Tashpolat oblystyq ІІD basshylyǵynan atalǵan qyzmetkerlerdi erekshe atap ótýdi ótinip otyr.
