Qostanaılyq polıtseıler janyp jatqan úıden 5 adamdy qutqardy
QOSTANAI. QazAqparat - Sarykól aýdandyq polıtsııa qyzmetkerleri órtten otbasyn qutqardy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
«Keshe túngi saǵat 01:30-dar shamasynda polıtsııa serjanty Dıas Qusymbaev pen polıtsııa aǵa serjanty Aleksandr Ilıashov kóshede patrýldeý kezinde jeke úıdiń shatyry janyp jatqanyn kóredi. Oqıǵa týraly dereý kezekshi bólimge habarlady. Olar jedel túrde órt shyqqan úıge jetti. Órt sóndirýshiler kelgenshe polıtseıler 2 eresek adam men 3 balany páterden alyp shyqty», - dedi baspasóz qyzmetiniń mamany Aıgúl Balǵabaeva.
Tártip saqshylary janyp jatqan úıden qundy zattar, qujattar jáne basqa da múlikterdi oqshaý jerge kóshirdi. Mamandar órt elektr symdarynyń qysqa tuıyqtalýynan shyqty dep boljap otyr.
