Qostanaılyq polıtseıler jalǵyz adamdy jabylyp urǵan on buzaqyny ustady

QOSTANAI.QazAqparat – Qostanaıda 34 jastaǵy er adamdy uryp-soǵyp, tonap ketken 10 adam ustaldy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.

Oqıǵa 21 qarasha kúni oblys ortalyǵynda boldy. Jábirlenýshi «102 « nómirine qońyraý shalyp, kómek suraǵan.

«Jábirlenýshi jaıaý patrýldeý polıtsııasynyń qyzmetkerlerine bolǵan oqıǵa týraly habarlady. Ony beıtanys adamdar uryp-soǵyp, 20 myń teńge aqshasy men velosıpedin tartyp alǵan. Patrýldik polıtsııa ınspektorlary Baıbol Jansúgirov pen Jandos Taıshenov dereý jedel ortalyqqa qońyraý shalyp, kúdiktilerdiń turǵan jerin anyqtaýdy surady. Sodan keıin polıtsııa zardap shekkendermen birge kelesi kóshede kúdiktilerdi tapty.

Polıtsııa qyzmetkerleri bir top jastarǵa jaqyndap, olardyń mas bolǵanyn baıqaǵan. Osy kezde jábirlenýshi olardyń ekeýin tanydy.

Jastar tártip saqshylarynyń zańdy talaptaryna agressıvti túrde jaýap berdi. Inspektor Jansúgirov qosymsha kúsh shaqyryp, jedel top kelgenge deıin olardy ustap turdy», delingen vedomstvo habarlamasynda.

Qazirgi ýaqytta atalǵan fakti boıynsha Qylmystyq kodekstiń 293-babynyń 1-bóligimen (buzaqylyq) sotqa deıingi tergeý amaldary júrgizilýde.