Qostanaılyq polıtseıler zeınetkerdiń ómirin saqtap qaldy
QOSTANAI. QazAqparat - Rýdnyı qalasynyń polıtseıleri jalǵyzilikti zeınetkerdi qutqaryp, órttiń aldyn aldy, dep habarlaıdy QazAqparat.
Oblystyq Polıtsııa departamentiniń baspasóz qyzmetinen málim etkendeı, 6 mamyr kúni Qashar kentiniń turǵyndary polıtseılerdi kómekke shaqyrǵan. Tıisti mekenjaıǵa barǵan ýchaskelik polıtsııa ınspektorlary Erlan Qozybaev pen jol-patrýldik polıtsııa rotasynyń serjanty Talǵat Erǵalıev páterdiń esigi ishinen jabylǵanyn jáne odan tútin shyǵyp jatqanyn kórgen.
«Kórshiler páter ishinde jalǵyzbasty zeınetker áıel turatynyn aıtqan. Tártip saqshylary birden órt sóndirý jáne jedel járdem qyzmetin shaqyrdy. Ózderi 5-qabatqa shyǵyp, balkon esigin buzyp, páterge kirgen. Ashanada es-tússiz jatqan egde áıeldi kóredi. Sol ýaqytta as úı peshindegi qazannan tútin shyǵyp jatty»,- dep túsindirdi Polıtsııa departamentiniń baspasóz hatshysy Irına Bejenar.
Keıin belgili bolǵandaı, 77 jastaǵy zeınetker qazandy peshke qoıǵannan soń ózin jaısyz sezingen. Dárigerler ájeıdiń sol ýaqytta ınsýlt alǵanyn rastady.
Osylaısha, Qashar polıtsııa bólimshesi qyzmetkerleri kóppáterli úıdegi órttiń aldyn aldy. Zeınetkerge der ýaqytynda medıtsınalyq kómek kórsetildi.
