Qostanaılyq polıtseıler turǵyndardy ashyq áńgimege shaqyrdy
QOSTANAI. QazAqparat – Qostanaı oblysynda osy aptanyń sońyna qaraı kezekti «Jolda qabyldaý» aktsııasy ótedi, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
Halyqpen keri baılanys jasaý, ashyq áńgime ornatý – Memleket basshysynyń tártip saqshylaryna qoıǵan tapsyrmasy. Soǵan baılanysty oblystyń polıtsııa bólimsheleri basshylary «Jolda qabyldaý» respýblıkalyq aktsııasynyń 5-kezeńin bastamaq. Shara 16-17 tamyz kúnderi saǵat 09:00-den 19:00-ge deıin departament, ákimshilik polıtsııa, jergilikti jáne kóshi-qon qyzmeti basshylyǵy, sondaı-aq qalalyq basqarmalar men aýdandyq polıtsııa bólimderinde ótedi. Budan basqa, turaqty rejimde 8 (7142) 52-57-58 qaýyrt jeli telefony jumys isteıdi, ol boıynsha qazir azamattar ózderin tolǵandyryp júrgen suraqtaryn qoıyp, kásibı keńes ala alady.
«Joldaǵy qabyldaý» mamandandyrylǵan avtobýstary myna máseleler boıynsha qyzmet kórsetedi: avtokólikti tirkeý, júrgizýshi kýálikterin, pasporttar men jeke kýálikterdi berý, jol qozǵalysyn uıymdastyrý, kóshi-qon zańnamasyn saqtaý, kólik quraldaryn qaıta jabdyqtaý, ákimshilik quqyq buzýshylyq úshin aıyppul tóleý, shaǵymdar, jol-patrýldik polıtsııasy qyzmetkerleriniń is-áreketterine shaǵymdaný, ýchaskelik jáne mektep ınspektorlarynyń jumysy. Maýsym aıynan bastap turǵyndardy qabyldaý jańa formatta jumys isteıdi. Polıtsııa qyzmetkerlerine arnaıy uıymdastyrylǵan úıishilik qabyldaý bólmeleri arqyly habarlasýǵa da bolady», - deıdi oblystyq polıtsııa departamenti bastyǵynyń mindetin atqarýshy Nyǵmet Ysmaǵulov.
Onyń aıtýynsha, oblysta 40 «aýladaǵy qabyldaý» núktesi uıymdastyrylǵan. Onda ýchaskelik polıtsııa ınspektorlary PIK-pen jáne turǵyn úı ınspektsııalarymen birlesip turǵyndardy jergilikti jerlerde mobıldik rejimde qabyldaıtyn bolady. Qazirdiń ózinde turǵyndardan 3 700 aryz-shaǵym túsken.
