Qostanaılyq polıtseıler tergeý isterin elektrondyq formatqa kóshirip jatyr

QOSTANAI.QazAqparat – Qostanaı polıtsııasynda árbir ekinshi is elektrondyq formatta tergeledi. Bul týraly Qostanaı oblysy Polıtsııa departamenti basshylyǵynyń tergeý bólimshelerimen kezdesýinde aıtyldy.

Onda 10 aıdaǵy jumys qorytyndysy shyǵaryldy, dep habarlaıdy QazAqparat tilshisi.

Oblystyq PD bastyǵy Beket Aımaǵambetov jıyn qatysýshylaryna Memleket basshysy Qasym-Jomart Toqaevtyń ІІM-niń keńeıtilgen alqa otyrysynda bergen tapsyrmalaryn jetkizdi.

«Іshki ister organdaryn reformalaýda zańdylyq pen ádildikke kóp kóńil bólinedi. Adamdardyń taǵdyry qylmystyq isterdegi qatelikterge baılanysty ekenin este saqtaý qajet. Bul týraly Prezıdent Qazaqstan halqyna Joldaýynda atap ótti», - deıdi Beket Aımaǵambetov.

Polıtsııa bastyǵynyń orynbasary Qaırat Dúısembekov tergeý bólimsheleriniń jumysy týraly aıtyp berdi. Tergeýshiler 3300-den astam qylmystyq isti tergedi jáne sotqa jiberdi, bul ótken jylmen salystyrǵanda 27% - ǵa kóp.

Departament bastyǵy B.Aımaǵambetov tergeýdiń elektrondyq formatyn eń aldymen sybaılas jemqorlyq táýekelderin joıatyn progressıvti jol retinde engizý qajettiligin atap ótti. Qostanaı oblysynyń tergeýshileri bir jyl buryn jańa kompıýterlermen, veb-kameralarmen qamtamasyz etilgen. Qazirgi ýaqytta tergeýdiń elektrondyq formattaǵy úlesi 53,8 paıyzǵa deıin jetkizildi. Bul árbir ekinshi isti Qostanaı polıtsııasy dál osylaı tergeıtinin bildiredi.

Qarasý aýdandyq polıtsııa bólimi bastyǵynyń orynbasary Pavel Belov búgingi jasalǵan jaǵdaılardyń arqasynda jyl sońyna deıin asa aýyr sanattaǵy isterdi qospaǵanda, barlyq isterdi tergeý elektrondyq formatta 70 paıyzǵa jetkiziletinin atap ótti. Mundaı mindettemeni oblystyń tergeýshileri men anyqtaýshylary aldy.

«Jumystaǵy eń bastysy-kásibılik jáne iske adaldyq. Azamattarǵa qurmetpen qaraý, iske qatysýshylarmen kezdesýge, tergeý eksperımentine jáne jaýap alýǵa muqııat daıyndalý. Siz is boıynsha túpkilikti sheshim qabyldaısyz, búkil polıtsııanyń bedeli osyǵan baılanysty»,- deıdi Beket Aımaǵambetov.

Jıynda óńirdiń úzdik tergeýshileri men anyqtaýshylary gramotalarmen jáne saǵattarmen marapattaldy.

Olardyń arasynda Qarasý aýdandyq polıtsııa bólimi bastyǵynyń orynbasary Pavel Belov, Rýdnyı qalasy PB aǵa tergeýshisi Baqtııar Seıitbekov jáne Qostanaı aýdany PB aǵa tergeýshisi Anastasııa Rogojına bar.

Jyl basynan beri polıtsııa maıory B.Seıtbekov aýyr jáne asa aýyr qylmystar boıynsha 25 qylmystyq isti tergedi. Olardyń biri retinde esirtkiniń úlken partııasyn zańsyz saqtaý isin atap ótse bolady. Rýdnyıdaǵy 49 jastaǵy er adamnyń garajynan 400 kelige jýyq esirtki tárkilendi. Polıtsııa qyzmetkeri kóptegen tergeý áreketterin, saraptamalardy júrgizip, isti sotqa jiberdi.

Kapıtan Anastasııa Rogojına – Tobyl qalasyndaǵy eń úzdik tergeýshi, polıtsııada 5 jyl jumys isteıdi, bıyl ol sotqa 45 qylmystyq isti joldaǵan.