Qostanaılyq polıtseıler sýıtsıd jasamaq bolǵan áıeldi qutqardy
QOSTANAI. QazAqparat – Jitiqara qalasynyń polıtsııa bólimi qyzmetkerleri balkonnan sekirip ketken bolǵan áıeldi qutqaryp qaldy, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, oqıǵa Jitiqara qalasynyń 4-shaǵyn aýdanynda bolǵan. Jergilikti turǵyndar úıdiń 4-shi qabatyndaǵy balkonnan sekirip ketkeli turǵan áıeldi kórip, polıtsııaǵa habar bergen. Oqıǵa ornyna patrýldik polıtseıler Abylaı Ámenov, Qaırat Ismaılov jáne Aldanysh Berdenov jumyldyryldy.
«Tártip saqshylary kelgende áıel balkonnyń jaqtaý temirinen ustap turǵan. Abylaı Ámenov úshinshi qabattaǵy balkonǵa shyǵyp, áıeldi ıyǵyna mingizip aldy. Osy ýaqytta Aldanysh Berdenov tórtinshi qabatqa kóterilip, páter ishine kirgizip aldy. Qaırat Ismaılov ta balkonǵa minip, áriptesi Abylaı Ámenovtiń qulap ketpeýin qadaǵalap turdy. Osylaısha, polıtseılerdiń jyldam ári batyl qımylynyń arqasynda 29 jastaǵy áıel aman qaldy», - delingen polıtsııanyń baspasóz habarlamasynda.
Polıtseılerdiń aıtýynsha, áıeldiń nelikten sýıtsıd jasamaq bolǵany belgisiz. Tekserý jumystary júrgizilýde.
Aıta keteıik, bıyl elimizde 58 bala ózine qol jumsap, qaza tapty. Bul týraly búgin QR Іshki ister mınıstri Erlan Turǵymbaev Ortalyq kommýnıkatsııalar qyzmetinde ótken halyqpen onlaın kezdesýinde aıtty.
