Qostanaılyq polıtseıler paraqorlyqpen qalaı kúrespek
Brıfıngte jemqorlyqqa qarsy birlesken jumystyń jol kartasy aıasynda vedomstvolar yntymaqtastyǵynyń negizgi baǵyttary talqylandy. Qos basshynyń birlesken brıfıngi óńirde birinshi ret ótip otyr. Beket Aımaǵambetovtiń aıtýynsha, bıyl óńirde eki ret polıtsııanyń front-keńsesinde azamattardy qabyldaý kúni ótti.
«Birinshi qabyldaýdy men jeke ótkizdim, ekinshisin jergilikti polıtsııa bólimderiniń basshylary júrgizdi. 100-den astam azamatty qabyldap, suraqtarǵa jaýaptar berdik, zań keńesteri ótkizildi. Endi 7 maýsymda tańǵy saǵat 10.00-den bastap meniń orynbasarlarym men jergilikti jerdegi bastyqtardyń orynbasarlary azamattardy qabyldaıdy», - dep atap ótti B.Aımaǵambetov.
Búginde halyqpen baılanys WhatsApp messendjeri arqyly da júrip jatyr. Qazir eki top qurylǵan. Ýchaskelik polıtsııa ınspektorlary 8 777 054 44 64 nómiri arqyly jurtshylyqtyń usynystaryn qabyldaıdy. Ekinshi topta polıtsııa qyzmetkerleri men PKSK tóraǵalary otyrady. Mundaı sheshim Qostanaı, Rýdnyı jáne Lısakov qalalarynyń PIK tóraǵalarymen birlesken keńeste qabyldandy.
Qostanaılyq polıtseıler paraqorlyqpen kúresýdiń birneshe jolyn usyndy. Solardyń biri - sybaılas jemqorlyq táýekelderin boldyrmaý úshin polıtsııanyń qatardaǵy qyzmetkerleri arasynda anonımdi on-Line saýalnama júrgiziledi.
«Osylaısha tártip saqshylardyń jurtshylyqpen qarym-qatynasyn, sybaılas jemqorlyqqa qarsylyǵyn baǵalaı alamyz. Basty maqsatymyz - sybaılas jemqorlyqpen kúresý ǵana emes, onyń sebepterin anyqtap, túbegeıli joıý. Osy baǵytta sońǵy birneshe jylda 60-tan astam zań qabyldandy. Polıtseıler bul turǵyda aýqymdy jumystar atqardy», - dedi
S. Múksimov.
Sondaı-aq, óńirde patrýldeý júıesi qaıta qaralmaq. Beket Aımaǵambetov aıtqandaı, ótken jyldyń 11 qyrkúıeginen bastap oblys ortalyǵynyń jol-patrýl polıtsııa qyzmetkerleri avtopatrýlder men statsıonarlyq beketterdiń kezekshilerin qysqartý esebinen jaıaý patrýldeýge aýystyryldy.
«Bul tájirıbe oń nátıje beredi. Aǵymdaǵy jyly turǵyn úı aýlalarynda jaıaý patrýlderdiń qyzmet atqarý múmkindiginiń arqasynda qoǵamdyq oryndar men kóshelerde jasalǵan qylmystardyń sany 21%-ǵa azaısa, sonyń ishinde tonaý, buzaqylyq, avtokólikterden urlaý 27%-ǵa qysqardy», - dep atap ótti polıtsııa departamentiniń bastyǵy.
Sondaı-aq, jospar sheńberinde sybaılas jemqorlyq táýekelderine júıeli syrtqy taldaý júrgizý kózdelgen, bul olardyń aldyn alýǵa múmkindik beredi. Bul úshin táýelsiz jumys toby qurylady, oǵan belsendi azamattar men sarapshylar kiredi.
