Qostanaılyq polıtseıler ózine qol salmaq bolǵan adamdy qutqaryp qaldy
QOSTANAI. QazAqparat – Polıtseıler ózine-ózi qol salmaq bolǵan adamdy aman alyp qaldy, dep habarlaıdy QazAqparat.
20 qazan kúni saǵat 21.00-de Rýdnyı qalasynyń polıtsııa qyzmetkerleri Qanat Ýálıev pen Jánibek Ǵalymhanov er adamnyń turǵyn úıdiń kireberisinde ózine qol jumsamaq bolǵany týraly habarlama alady. Tártip saqshylary dereý oqıǵa ornyna kelgen.
«Mejeli jerge jetken soń, biz baspaldaqpen kóterile bastadyq. Saty temirine asylyp turǵan er adamdy baıqadyq. Birden qutqarý sharalaryn uıymdastyrdyq», - deıdi patrýldik polıtsııa rotasynyń polıtseıi Qanat Ýálıev.
Polıtsııa qyzmetkerleri zardap shekken adamdy arqannan bosatyp, qutqaryp qalǵan, biraq er adam essiz kúıde edi. Tártip saqshylary oǵan alǵashqy medıtsınalyq kómek kórsetken soń esin jıǵan.
Keıin 30 jastaǵy er adam turmystyq janjal kesirinen osyndaı qadamǵa barǵany belgili boldy. Polıtsııa qyzmetkerleriniń arqasynda er adam jazataıym oqıǵadan qutqarylyp, adam ómirin saqtap qaldy.
