Qostanaılyq polıtseıler mal izdep júrip joǵalyp ketken jigitti qutqardy

QOSTANAI. QazAqparat — Qostanaı oblystyq polıtseıleri jylqylaryn izdeýge shyǵyp, adasyp ketken aýyl turǵynyn tapty, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.

Amangeldi aýdandyq polıtsııa bóliminiń «102» pýltine er adamnyń dalada joǵalyp ketkeni týraly habar túsken.

«Іz-túzsiz joǵalǵan adamnyń týystarynyń aıtýynsha, 19 jeltoqsanda Amangeldi aýylynyń eki turǵyny atqa minip, tańerteń joǵalǵan jylqylaryn izdeýge shyqqan. Aýyl turǵynynyń biri keshke qaıtyp kelgen. Ekinshisi bir táýlik boıy oralmaǵan, telefony sónip qalǵan. Anyqtalǵandaı, olar malyn bólinip izdegen. 21 jastaǵy aýyl turǵyny dalada adasyp qalǵan», - dep túsindirdi polıtsııa departamentinen.

Ony izdeýge Amangeldi aýdandyq polıtsııa bóliminiń polıtseıleri Ersultan Qarın, Baqtııar Shóptibaev jáne Erǵalı Janarbaev shyqty.

Іzdeý sharalary barysynda tártip saqshylary birneshe saǵattan keıin Amangeldi aýylynan 30 shaqyrym qashyqtyqtan dalada tońyp qalǵan jigitti tapqan.

Ol polıtseılerge adasyp qalǵanyn aıtqan. Tártip saqshylary jigitti úıine jetkizdi.

Din aman tabylǵan Asylan Qazıhan olarǵa alǵys aıtty.