Qostanaılyq polıtseıler kóshede maska taratyp júr
QOSTANAI.QazAqparat – Qostanaı oblysy Polıtsııa departamentiniń qyzmetkerleri kóshege shyǵyp, medıtsınalyq maskalar taratýda, dep habarlaıdy QazAqparat.
Aqparatty polıtsııanyń baspasóz qyzmeti taratty. Tártip saqshylary óńirdegi «Bolshevıchka» tigin fabrıkasy tikken maskalardy turǵyndarǵa taratyp jatyr.
«Jalpy pandemııa bastalǵaly polıtseıler kóshede turǵyndarǵa myńnan astam maska taratqan. Búginde kóshede maska taǵyp júrýdi qostanaılyqtardyń kóbi ádetke aınaldyrǵan. Burynǵydaı maska tapshylyǵy joq. Baǵa da turaqtandy. Degenmen, kóshedegi kisige sapaly ári tegin maskany tosyn syıǵa tartý arqyly jaýapkershiliktiń artýyna yqpal etemiz. Mundaı aktsııalardy biz dástúrli túrde ótkizip turamyz. Bul baǵyttaǵy jumys áli de jalǵasa beredi», - dedi patrýldik polıtsııa batalonynynyń ınspektory Qýanysh Іzbasarov.
Aıta keteıik, buǵan deıin qostanaılyq polıtseıler «Bolshevıchka» fabrıkasynyń qyzmetkerlerimen birge qoǵamdyq kólik jolaýshylary men kóshedegilerge 500 maska taratty.
