Qostanaılyq polıtseıler kópbalaly otbasyny Naýryz merekesimen quttyqtady

QOSTANAI. QazAqparat - Uzynkól aýdanynyń polıtseıleri kópbalaly otbasyn Naýryz merekesimen quttyqtady, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Naýryz - qamqorlyq aıy. Uzynkól aýdanynyń polıtseıleri osy qaǵıdattan aınymaı, kópbalaly Lebedevter otbasyn Ulystyń uly kúnimen quttyqtap shyqty.

«Bul úıdiń 4 balasyn ájesi men ákesi baǵyp otyr. Kishisi bir jastan endi asty. Turmys jaǵdaılaryna baılanysty anasy balalaryn tastap, basqa aýylǵa ketip qalǵan. Sol sebepti osy otbasyn qamqorlyǵymyzǵa aldyq», - deıdi uzynkóldik polıtseıler.

Tártip saqshylary bul joly balalarǵa et asyp, baýyrsaq pisirip ákeldi. Sonymen qatar, olar aýyl ishinde tigilgen kıiz úılerge soǵyp, qazaqtyń ulttyq taǵamdaryn taratty.

Uzynkól aýdanynda merekege oraı ulttyq sport oıyndarynan jarystar ótkizildi. Jastar qazaqtyń salt-dástúrlerinen kórinister kórsetip, kontserttik baǵdarlama uıymdastyrdy.