Qostanaılyq polıtseıler qaza bolǵan áriptesteriniń otbasylaryna syı jasady

QOSTANAI.QazAqparat – Qostanaılyq polıtseıler qaza bolǵan áriptesteriniń otbasylaryna baryp, Táýelsizdik kúnimen quttyqtady, dep habarlaıdy QazAqparat oblystyq Polıtsııa departamenti baspasóz qyzmetine silteme jasap.

Polıtsııa qyzmetkeri Fedor Balanovskıı 1992 jyly qyzmettik mindetin atqarý kezinde qaza tapqan-dy. Mılıtsııa starshınasy Fedor Balanovskııge qaskóıler oq atqan. Ol Іshki ister organdarynda 14 jyl qyzmet etken. Áriptesteriniń aıtýynsha, Fedor tájirıbesi mol maman bolǵan.

«1992 jylǵy 7 tamyzda mılıtsııa starshınasyn kúdikti er adam tabeldik qarýmen atyp, jaraqattaıdy. Qaza tapqan tártip saqshysynyń esimi Qostanaı oblysy Polıtsııa departamentiniń «Mılıtsııa dańqy» memorıaly men murajaıynda saqtalǵan», delingen polıtsııa aqparatynda.

Serjant Qaıyrjan Jappasbaevtyń esimi de máńgi este qalady. Jol polıtsııasy ınspektory 2009 jyly 1 tamyzda mas júrgizýshiniń kinásinen bolǵan jol apaty saldarynan qaza tapty. «Sol kezde polıtseı jol qozǵalysynyń saqtalýyn qadaǵalaýdy júzege asyryp turǵan bolatyn. Medıtsınalyq pýnktke barar jolda tártip saqshysy aýyr dene jaraqattarynan kóz jumdy. Polıtseıdiń artynda jubaıy Gúljan men uly Dáýlet qaldy.

Kadr saıasaty basqarmasy bastyǵynyń orynbasary Qýanysh Dúısebaev Tatıana Balanovskaıa men Gúljan Jappasbaevaǵa gúl shoqtaryn tapsyryp, tártip saqshylary atynan materıaldyq kómek kórsetti.

Áıelder polıtseılerge jubaılaryn eske alǵany jáne kóp kóńil bólgeni úshin alǵys aıtty», - deıdi polıtsııanyń baspasóz qyzmetindegiler.

Tártip saqshylary ár jyldary qyzmet babynda qaza tapqan 17 áriptesiniń otbasyna bardy.

Aıta ketý kerek, qostanaılyq polıtseıler qaza tapqan polıtseılerdiń otbasyna turaqty túrde qoldaý kórsetýde.