Qostanaılyq polıtseıler karantın talabyn buzǵandardy dronmen anyqtaýda
Oblystyq polıtsııa departamentiniń 1200 qyzmetkeri kúsheıtilgen rejımde qyzmet atqaryp, saıabaqtarda, skverlerde jáne jaǵalaýlarda reıd uıymdastyrdy. Arnaıy qurylǵylar men drondardyń kómegimen sýǵa túskender anyqtalyp, ózen jaǵasynda demalys uıymdastyrǵandarǵa aıyppul salyndy.
«Óńirdiń bas sanıtar dárigeriniń qaýlysynda kórsetilgen talaptardy buzý boıynsha 32 derek tirkeldi. Máselen, 15 tamyzda Arqalyq qalasynda 20 adamnyń qatysýymen qudalyq toıy jasalǵan. Dál osyndaı toı Áýlıekól aýdanynyń Qusmuryn aýylynda da ótken. Aýlada kıiz úıler tigilgen. Sondaı-aq, qatań karantın sharalaryna qaramastan, saýna men jaldamaly kottedj qyzmeti júzege asyrylǵan. Tártip buzýshylarǵa QR Ákimshilik quqyq buzýshylyq kodeksiniń 425-babymen hattama toltyryldy. Lokdaýn tártibin buzǵan ár adamǵa 83340 teńge aıyppul salyndy», delingen polıtsııanyń aqparatynda.
Polıtsııa qyzmetkerleri eriktilerdiń qatysýymen Qostanaı, Rýdnyı, Lısakov jáne Jitiqara qalalarynda karantındik sharalardy saqtaý boıynsha aktsııa ótkizip, 2000 adamǵa qorǵanysh maskalaryn taratty.