Qostanaılyq polıtseıler qar qursaýynda qalǵan balaly áıeldi qutqardy
QOSTANAI. QazAqparat – Qostanaı polıtseıleri 7 sáýir kúni boran jaǵdaıynda 100-den astam kólik júrgizýshisine kómek kórsetti, dep habarlaıdy «QazAqparat» HAA aımaqtyq polıtsııa departamentiniń baspasóz qyzmetine silteme jasap.
Qalalyq polıtsııa batalonynyń qyzmetkerleri Nurhan Ysqaqov, Abaı Qalıtpaev, Rústem Júnisov jáne Erkin Omarov KSK shaǵyn aýdanynda qar qursaýynda qalǵan «Aýdı» kóligin kórdi. Kólikte júrgizýshi men onyń áıeli, eki aılyq sábıi bolǵan.
«Eki qyzmetker júrgizýshige kóligin shyǵarýǵa kómektesse, al qalǵandary ana men balany úıine jetkizdi. Biraq úıdiń kireberisine jol bolmady. Osylaısha, polıtseıler sábıdi jaıaý úıge deıin jetkizdi», - deıdi polıtsııanyń baspasóz qyzmetindegiler.
Osy kúni polıtseıler qar qursaýynda qalǵan 100-den astam kólik júrgizýshisine kómektesken.
