Qostanaılyq polıtseıler iz-túzsiz joǵalǵan boıjetkenge izdeý saldy

QOSTANAI. QazAqparat –2003 jyly týǵan Korobova Anastasııa Aleksandrovnanyń ornalasqan jerin anyqtaý úshin oblystyq polıtsııa departamentiniń jeke quramy jumyldyryldy, dep habarlaıdy QazAqparat tilshisi.

20 qańtarda «Ońtústik» polıtsııa bólimine qala turǵyny júginip, kámeletke tolmaǵan qyzy Anastasııa Korobovanyń joǵalyp ketkenin habarlaǵan.

17 jasar Anastasııa buǵan deıin de birneshe ret úıinen ketip qalǵan.

«Korobova Anastasııa Aleksandrovna 2021 jylǵy 17 qańtarda úıinen shyǵyp ketip, qaıta oralmaǵan. Ol devıantty minez-qulyqty balalarǵa arnalǵan arnaıy bilim uıymyna qarasty ıývenaldy polıtsııa bólimshesiniń esebinde tur. Polıtsııa qyzmetkerleri eriktilermen birlesip belsendi izdestirý jumystaryn júrgizýde, jastar kóp jınalatyn oryndar tekserildi, áleýmettik jelilerde aqparat jarııalandy» delingen polıtsııa aqparatynda.

Polıtsııa joǵalyp ketken boıjetkenge qatysty aqparatty jarııalady.

Onyń boıy – 156 sm, ortasha deneli, shashy aqshyl, ıyǵynan tómen túsken, ıyǵynda tatýırovkasy bar.

Úıden shyqqanda ústinde qońyr kýrtka, kók tústi bas kıim, sur tústi shalma, ashyq kók djıns shalbary bolýy múmkin.

Ózimen birge uıaly telefon almaǵan.

Kámeletke tolmaǵan qyzdyń turǵan jeri týraly qandaı da bir aqparatyńyz bolsa, «102» nómirine qońyraý shalyńyz.