Qostanaılyq polıtseıler halyqqa qyzmet kórsetýdiń servıstik modeline kóshpek
Oblystyń bas polıtseıi Beket Aımaǵambetov búgingi kúni Іshki ister organdarynyń aldyna qoıylǵan mindetterge jáne jyl boıǵy nátıjelerge toqtaldy. Búginde oblystyq polıtsııa departamentiniń barlyq ekıpajdary qajetti quraldarmen jabdyqtalǵan. Tártip saqshylary kez kelgen oqıǵa ornyna kelip, syzbasyn jasap, sodan keıin qujattardy planshetterde rásimdeı alady. Osylaısha, kólikter jol boıynda turmaıdy, qujat jol-kólik oqıǵasynan soń qujat rásimdeý nebary 30 mınýt. Patrýldik polıtseılerdiń avtokólikteriniń júk salǵyshynda jol-kólik oqıǵasynan zardap shekkenderge alǵashqy kómek kórsetý jaǵdaıyna arnalǵan aljapqysh bar. Tártip saqshylary osyndaı kıimniń arqasynda joldaǵy kez kelgen jaǵdaıǵa daıyn. Bul jumystyń tıimdiligine jýrnalıster men blogerler de kýá bolǵan.
Beket Aımaǵambetovtiń sózinshe, oblys aýmaǵynda mas kúıinde aýyr qylmys jasaýdyń aldyn alýǵa baǵyttalǵan «Maskúnem» jedel-aldyn alý is-sharasy ótkizildi. Nátıjesinde, ótken bir apta ishinde aýyr qylmys tirkelgen joq. Bir jarym myńnan astam ákimshilik quqyq buzýshylyq anyqtaldy, bul ortasha statıstıkalyq kórsetkishten eki ese asyp túsip otyr.
«Tek qoǵamdyq oryndarda ishimdik ishkeni úshin 800-den astam azamat jaýapqa tartyldy. Spırttik ishimdikti satqany úshin dúken ıelerine qatysty 106 ákimshilik hattama toltyryldy. 49 lıtsenzııasyz alkogol satý faktisi anyqtaldy. Sonymen qatar, mas kúıinde jasalǵan buzaqylyq sany aıtarlyqtaı azaıdy. Osy ýaqyt ishinde oblys boıynsha kisi óltirý jáne densaýlyqqa aýyr zııan keltirý faktileri tirkelgen joq. Kóshe qylmysy tómendedi. Qabyldanǵan sharalardyń arqasynda osy baǵyttaǵy jaǵdaıdy turaqtandyrýǵa qol jetkizildi. Endi jumys qarqynyn tómendetpeý qajet. Jedel aldyn alý is-sharasy kezinde izin sýytpaı birneshe aýyr qylmys ashyldy», - dedi Beket Aımaǵambetov.
«Maskúnem» sharasy aıasynda oblystyq patrýldik polıtsııa rotasynyń qyzmetkerleri Áýlıekól kentinde jergilikti kásipkerge shabýyl jasaǵan qaraqshylardy ustady. Qostanaı qalasyndaǵy «Kıevskıı» dúkenine jasalǵan tonaý da birden ashylǵan.
Beket Aımaǵambetov jeke quramǵa arnaǵan sózinde júrgizýshilerdi sebepsiz toqtatýǵa bolmaıtynyn atap ótti. Sol sebepti qostanaılyq tártip saqshylary halyqqa qyzmet kórsetýdiń servıstik modeline kóshpek. Basty maqsat – polıtseılerdiń halyqqa jaqyn bolýy, ashyq jumys isteýi. Bul mindetterdi ishki ister mınıstri polıtsııa general-leıtenanty Erlan Turǵymbaev atap ótken bolatyn.
