Qostanaılyq polıtseıler bir otbasyn órtten aman alyp qaldy
QOSTANAI. QazAqparat - 15 qazan kúni túnde Amanqaraǵaı aýylynda polıtsııa qyzmetkerleri janyp jatqan úıden áıel men onyń balalaryn qutqaryp qaldy, dep habarlaıdy QazAqparat tilshisi Qostanaı oblysy ІІD baspasóz qyzmetine silteme jasap.
«Qostanaı-Áýlıekól» baǵytynda kezekshilikte júrgen polıtsııa ekıpajy shamamen túngi saǵat tórtte Amanqaraǵaı aýylynda jeke úıdiń janyp jatqanyn kóredi.
«Oqıǵa ornyna polıtseıler jetkende ot úıdiń shatyryna deıin sharpyp ketipti. Tek ishtegi balalardyń aıqaılaǵan daýystary estilip turǵan. Serjanttar Saıat Tańatqanov pen Mámed Erǵalı jáne arnaıy jasaq qyzmetkeri Almas Óteýli lezde qımyldap, turǵyndardy syrtqa alyp shyqty» - delingen ІІD baspasóz habarlamasynda.
Polıtseıler úı ishinen gaz ballonyn da shyǵarǵan. Keıinnen aýmaqty qorshaýǵa alyp, órt sóndirý qyzmetine qońyraý shaldy.
Órttiń shyǵý sebepteri anyqtalýda. Balalardyń aıtýynsha, aldymen úı qasyndaǵy monsha tutanǵan.
