Qostanaılyq polıtseıler balalar úıine sport jabdyqtaryn syıǵa tartty
QOSTANAI. QazAqparat – Balalardy qorǵaý kúni qarsańynda polıtseıler Rýdnyı balalar úıiniń tárbıelenýshilerin quttyqtap, syılyqtar tabys etti, dep habarlaıdy QazAqparat.
Qostanaı oblysynyń balalar úıi Rýdnyı qalasynda ornalasqan. Munda búginde 228 bala tárbıelenýde, onyń toǵyzy mektepke deıingi jasta. Búgin tártip saqshylary balalarǵa baryp, sport quraldaryn, oıynshyqtar tapsyrdy. Sharaǵa Qostanaı oblysy polıtsııa departamenti bastyǵynyń orynbasary Ardaq Yntyqbaev qatysty.
Onyń aıtýynsha, polıtsııa birneshe jyl boıy oblystyq balalar úıin qamqorlyqqa alyp, tárbıelenýshilerge kómek kórsetip keledi.
«Karantın jaǵdaıyna baılanysty biz balalardy jeke quttyqtaı almaımyz, degenmen olardyń merekelik kóńil-kúıin saqtaý kerek. «Dınamo» sporttyq qoǵamymen birlese otyryp, balalarǵa qajetti qural-jabdyqtar tartý etýdi jón sanadyq. Biz osy mekemeniń tárbıelenýshileriniń kóptegen sporttyq jetistikteri bar ekenin jaqsy bilemiz»,-deıdi A. Yntyqbaev.
Rasymen de, oblystyq balalar úıiniń fýtbol komandasy ótken jyly Qazaqstan chempıonatynda ekinshi oryn alyp, Olga Kım esimdi tárbıelenýshi ústel tennısinen respýblıkalyq týrnırde jeńiske jetti. Budan bólek ulttyq oıyndar boıynsha kórsetkishteri kóńil qýantarlyqtaı.
Rýdnyı balalar úıi dırektorynyń tárbıe jumysy jónindegi orynbasary Elena Spasıýk polıtseılerge kóńil bólip, kómek kórsetkeni úshin alǵys aıtty.
«Biz polıtsııa qyzmetkerlerine óte rızamyz. Únemi bizdi qoldap otyrady. Bıyl Naýryz merekesinde polıtseılerden qomaqty syılyqtar aldyq. Bizdiń tárbıelenýshilerimizdiń arasynda polıtsııada qyzmet etetinderi bar. Olardy únemi maqtan tutamyz. Osy jyly bir túlegimiz QR ІІM akademııasyna túsýge daıyndalýda»,- dep atap ótti E. Spasıýk.
Syılyqtardy alǵannan keıin balalar polıtseılerge alǵys aıtyp, beınejazba joldady.
