Qostanaılyq polıtseıler azamattardy ınternet alaıaqtardan saqtandyrýda
QOSTANAI. QazAqparat - Qostanaı oblysynda beleń ala bastaǵan ınternettegi alaıaqtyq faktilerine baılanysty, polıtsııa qyzmetkerleri turǵyndardy saqtyqqa shaqyryp jatyr, dep habarlaıdy Qostanaı oblystyq ІІD baspasóz qyzmetine silteme jasap.
Polıtsııa «Qostanaı qalasynyń polıtsııasy turǵyndardy ınternettegi alaıaqtardyń arbaýyna túspeýge shaqyrady. QIWI-ámııanǵa aqsha aýdarmas buryn, satýshynyń ózi jaıly bergen málimetteriniń durys ekenine kóz jetkizińizder», - dep jazylǵan paraqshalardy taratyp júr.
Quqyq qorǵaý organdarynyń belsendi jumys júrgizýine qaramastan, ınternettegi alaıaqtyq faktileri azaıar emes.
«2018 jyldyń basynan beri Qostanaı qalasynyń aýmaǵynda 338 alaıaqtyq deregi tirkelgen, sonyń 66-sy ınternettegi alaıaqtyqqa qatysty. Máselen, 8 shilde kúni er adam habarlasyp, «Kolesa» saıtynda avtobólshek satyp alý úshin ınternet arqyly 30 teńge aýdarǵanyn, biraq aqshany alǵan satýshy sol kúıi «izin sýytqanyn» aıtty. Dál osyndaı jaǵdaıǵa 25 jastaǵy qyz da tap bolǵan. 10 shilde kúni ol «OLH» saıty arqyly jıhazǵa tapsyrys berip, 10 myń teńgesin aldyn ala tólegen. Aqyr sońynda - aqsha da joq, jıhaz da joq bolyp shyqty», - dep málimdedi ІІD ókilderi.
Vedomstvo ókilderiniń aıtýynsha, alaıaqtar kóbinese «OLX», «Kolesa» saıttaryna jarnama beredi. Olar jábirlenýshilerdi negizinen arzan baǵa jáne tegin jetkizý tásilderimen aldaıdy.
Osyǵan baılanysty, polıtseıler azamattardy ınternettegi alaıaqtardyń arbaýynan saq bolýǵa shaqyrady.
