Qostanaılyq polıtseıler 6 jyldan beri ustatpaı júrgen uryny qolǵa túsirdi
QOSTANAI. QazAqparat – Qarasý aýdandyq polıtsııa bóliminiń qyzmetkerleri 6 jyl boıy urlyq jasap kelgen Aqmola oblysynyń 42 jastaǵy turǵynyna qatysty qylmystyq isti aıaqtady, dep habarlaıdy QazAqparat.
Іs derekterinde kórsetilgendeı, 2013 jyldan bastap, aýdannyń polıtsııa bólimine jergilikti turǵyndardan 13 ótinish kelip túsken. Olar turmystyq tehnıka, avtokólik bólshekteri, akkýmýlıator, qurylys materıaldary jáne basqa da usaq bólshekteriniń urlanǵanyn aıtyp shaǵymdanyp kelgen.
«Barlyq derek boıynsha qylmystyq ister tirkelgenimen, alaıda uzaq ýaqyt boıy ashylmady. Buǵan qylmystyń ýaqytta ǵana jasalǵany sebep boldy. Kúdikti negizinen dúkender, garajdar, avtomashınalar, sondaı-aq sharýashylyq oryndaryn tonap ketip otyrǵan. Ákki ury jymysqy áreketterinen aýdannyń Oktıabrskoe, Jeleznodorojnoe, Sholǵashy jáne Janyspaı aýyldarynyń turǵyndary zardap shekti», - deıdi Qarasý aýdany PB tergeýshisi, polıtsııa maıory Konstantın Lorents.
Jedel-izdestirý is-sharalaryn júrgizý barysynda tártip saqshylary Aqmola oblysyndaǵy áriptesterimen birlesip, kúdiktini Esil qalasynda qolǵa túsirdi. Tergeý barysynda anyqtalǵandaı, er adam Aqmola oblysynda da birneshe urlyq jasap úlgergen.
«Onyń páterin tintý kezinde urlanǵan kóptegen zattar tabyldy, olar keıin zańdy ıelerine qaıtaryldy. Ustalǵan azamat óz kinásin moıyndady. Sonymen qatar, jábirlenýshilerge materıaldyq shyǵyn ishinara óteldi. Jalpy bir de bir qylmys nemese quqyq buzýshylyq nazardan tys qalmaıdy. Olardy ashý boıynsha polıtsııa qyzmetkerleriniń qajyrly jumysy oń nátıje beredi», - dep atap ótti tergeýshi Konstantın Lorents.
Qazirgi ýaqytta 42 jastaǵy uryǵa qatysty qylmystyq is sotqa joldanady. Polıtsııa qyzmetkerleri óz múlikterin urlaýǵa jáne saqtaýǵa qarsy turý maqsatynda oblys turǵyndaryn qarapaıym saqtyq sharalaryn paıdalanýdy suraıdy. Atap aıtqanda, kiretin esikke qosymsha bekitý qurylǵysyn ornatý, kólik quraldaryn, garajdardy, sharýashylyq qurylystaryn qaraýsyz qaldyrmaý.
Eske salsaq, 2020 jylǵy 11 qańtardan bastap QR Zańnamasyna engizilgen ózgeristerge sáıkes urlyq (turǵyn, qyzmettik nemese óndiristik úı-jaıǵa, qoımaǵa nemese kólik quralyna zańsyz kirýmen jasalǵan) aýyr qylmystar sanatyna aýystyryldy. Bap sanktsııasy qatańdatyldy jáne múlkin tárkileýmen 2 jyldan 7 jylǵa deıin bas bostandyǵynan shekteý nemese aıyrý jazasyn kózdeıdi.
