Qostanaılyq polıtseıge baǵynbaı ózin-ózi urǵan
QOSTANAI. QazAqparat - Qostanaılyq tártip saqshylar 3 mln teńgege jýyq zergerlik buıymdardy urlaǵan kúdiktilerdi qamaýǵa aldy, dep habarlaıdy QazAqparat tilshisi oblystyq ІІD baspasóz qyzmetine silteme jasap.
Qylmystyq oqıǵa Uzynkól aýylynda bolǵan. Buzaqylar dúkenge plastık terezeden kirip, zergerlik buıymdardy qoldy qyldy. Shyǵyn kólemi - 2 700 000 teńge. Іz kesý sharalary barysynda eki azamat ustaldy.
«24 jastaǵy Fedorov aýylynyń turǵyny buǵan deıin de osyǵan uqsas qylmysqa barǵan. Onyń bul joly Rıajskıı aýylynyń turǵynymen birigip, urlyq jasaǵany anyqtaldy. Sońǵysy 8 qańtar kúni oblys ortalyǵyndaǵy Qobylandy batyr kóshesinde ustaldy. Ol tártip saqshylaryna baǵynbaı, tipti óz-ózine birneshe soqqy jumsaǵan», - dep habarlady baspasóz qyzmeti.
Kúdikti osy qylyǵy úshin ákimshilik jaýapkershilikke tartyldy. Qazirgi ýaqytta ol Uzynkól aýdany ýaqytsha ustaý ızolıatoryna qamaldy.
Eki azamatqa qatysty qylmystyq is sottyń tergeýine alyndy.
