Qostanaılyq polıtseı poıyzdyń astyna túspek bolǵan áıeldi qutqardy
QOSTANAI. QazAqparat – Qostanaı qalasy polıtsııa basqarmasynyń «Soltústik» polıtsııa bólimshesiniń qyzmetkeri Leonıd Bot kezekshilik barysynda poıyz astyna túsip, óz ómirin qımaq bolǵan áıeldi qutqardy, dep habarlaıdy QazAqparat.
Oblystyq polıtsııa departamenti baspasóz qyzmetiniń taratqan aqparatyna súıensek, oqıǵa tańǵy saǵat 04:00 shamasynda Ýzkokoleınyı kóshesinde bolǵan. Tártip saqshysy temir jolynyń boıynda bir áıeldiń jatqanyn, onyń qasynda bir áıeldiń turǵanyn baıqap qalady. Relste jatqan áıel ómir súrgisi kelmeıtinin aıtyp, qarsylyq bildirgen.
«Osy ýaqytta jaqyndap kele jatqan poıyzdyń dybysy estildi. Polıtsııa qyzmetkeri jaǵdaıdy baǵamdap, dereý kóliginen túsip, kómekke umtylǵan.
Áıeldi qolynan ustap, ornynan kóterip, rels arasynan alyp shyǵady. Maıor L.Bot oblys ortalyǵynyń turǵynyn qaýipsiz jerge aparyp, eki áıeldi tynyshtandyrýǵa tyrysqan.
Bul rette sýıtsıd jasamaq bolǵan áıeldiń qurbysy polıtsııa qyzmetkerine alǵysyn aıtyp, der shaǵynda tap bolǵanyn atap ótti. Sebebi eger tártip saqshysy bolmasa, bul jaǵdaıdyń qaıǵyly aıaqtalýy múmkin edi», - dep atap ótti vedomstvonyń baspasóz qyzmetindegiler.
Tártip saqshysynyń sózinshe, mundaı jaǵdaıǵa birinshi ret kezigip otyr.
«Eń bastysy, ne isteý kerek ekenin tez arada sheshtim. Árıne, bizdiń qyzmette erekshe nazar aýdarylatyn fızıkalyq qabilet kómektesti», - deıdi Leonıd Bot.
Esterińizge sala keteıik, 20 qazanda Rýdnyı qalasy PB qyzmetkerleri aǵa serjant Qanat Ýálıev pen polıtsııa leıtenanty Jánibek Ǵalymhanov qalanyń turǵyn úıleriniń kireberisindegi ózine-ózi qol jumsamaq bolǵan er adamdy qutqarǵan bolatyn.
