Qostanaılyq polıtseı muz astyna túsip ketken balyqshyny qutqaryp qaldy
QOSTANAI. QazAqparat - Qostanaı oblysynyń mamandandyrylǵan kúzet qyzmeti basqarmasynyń polıtseıi, serjant Nursultan Atyǵaı muz astyna túsip ketken balyqshyny qutqaryp qaldy, dep habarlaıdy QazAqparat oblystyq PD baspasóz qyzmetine silteme jasap.
Mamandandyrylǵan kúzet qyzmeti basqarmasynyń polıtseıi, serjant Nursultan Atyǵaı «Sergeev sý qoımasy» kúzetiletin obektisin tekserý kezinde sýǵa batyp bara jatqan er adamdy baıqaıdy. Ol jalma-jan balyqshyny qutqarýǵa júgirgen.
«Polıtsııa qyzmetkeriniń batyl is-áreketiniń arqasynda 66 jastaǵy zeınetker Gavrııl Kım qutqaryldy. Rýdnyı turǵyny tańerteń balyq aýlaýǵa kelgen. Ózenniń qarsy betine ótetin kezde muz jarylyp ketken. Gavrııl Sergeevıch óz erkimen shyǵýǵa talpynyp qansha tyrmysqanymen, qolynan kelmedi», - delingen PD baspasóz habarlamasynda.
Balyqshy polıtseıge kómegi úshin alǵys aıtyp, rızashylyǵyn bildirdi.
Mamandandyrylǵan kúzet qyzmeti basqarmasy janqııarlyq áreketke barǵan polıtsııa serjantyn marapattaýdy josparlap otyr.
