Qostanaılyq polıtseı alǵashqy medıtsınalyq kómek kórsetip, adam ómirin saqtap qaldy
Aman qalǵan azamattyń jubaıy Svetlana Komıssarova polıtsııa qyzmetkerine rızashylyǵyn bildirdi.
«Joldasym ekeýmiz tańerteń jumystarymyzben kóshege shyqtyq. Pıonerskaıa men Dzerjınskıı kósheleriniń qıylysynda ol qatty aýyryp, esinen tanyp qaldy. Men qatty shoshydym, sebebi mundaı jaǵdaıda ne isteý kerektigin bilmedim», - deıdi S.Komıssarova oqıǵa týraly.
Osy sátte ýchaskelik polıtsııa qyzmetkeri jeke kóligimen ótip bara jatqan. Ol jaǵdaıdy tez baǵamdap, esinen tanǵan azamatqa alǵashqy medıtsınalyq kómek kórsetedi. Esin jıǵan ol tártip saqshysynyń kóligimen aýrýhanaǵa jetedi.
«Qazir meniń kúıeýim aýrýhanada, onyń ómirine qaýip tónip turǵan joq. Biraq dárigerler eger polıtseıdiń ýaqtyly áreketi bolmaǵanda, onyń saldary qaıǵyly aıaqtalýy múmkin ekenin aıtty. Aıdos Qulymbetovke kúıeýimniń ómirin qutqarǵany úshin alǵysym sheksiz», - dep atap ótti Svetlana Komıssarova.
Aıdos Qulymbetov polıtsııada 5 jyldan beri jumys istep keledi. Ol buǵan deıin de kisi ómirine arasha túsken. 2018 jyly QR Іshki ister mınıstriniń qolynan turǵyndardy órtten qutqarǵany úshin «Erligi úshin» medalin aldy.
«Bul meniń jumysym, kez kelgen jaǵdaıda adamdarǵa kómektesý - basty mindetim», - deıdi polıtseı.
