Qostanaılyq polıtseı álem chempıony atandy
QOSTANAI. QazAqparat - Djıý-djıtsýdan Bolgarııada ótken polıtsııa jáne quqyq qorǵaý organdarynyń arasyndaǵy álem chempıonatynda qostanaılyq sportshy jeńimpaz atandy, dep habarlaıdy QazAqparat.
Áskerıler arasyndaǵy dástúrli týrnır Bolgarııanyń Banska qalasynda ótti. Baıraqty básekege qatysqan Qostanaı oblystyq ІІD qyzmetkeri Oljas Saqaýlov 85 keli salmaq dárejesinde birden eki medal utyp aldy.
«Álem chempıony bolý - ár sportshynyń armany. Osy maqsatqa jetý úshin kóp eńbektendik. Quqyq qorǵaý organdary salasynda 15 jylǵa jýyq ýaqyt qyzmet etip kelemin. Bul - meniń eń iri jeńisim. Endigi oıym Ábý-Dabıde ótetin álem chempıonatyna qatysyp, top jarý. Sáýir aıynda ótetin jarysqa daıyndyqty bastap kettik», - deıdi sportshy.
Oljas aldymen «Nevaza - sıstem» júıesi boıynsha óner kórsetti. Ol birinshi kezdesýinde jarys ıesi - bolgarııalyqtan basym tústi.
«Jartylaı fınalda ıtalııalyqpen shyqtym. Onyń aılaker sportshy ekenin aldyńǵy básekelerinen-aq bilgenmin. Rasyn aıtý kerek, bastapqyda ol menen basym túsip otyrdy. Degenmen, kezdesýdiń aıaqtalýyna 15 sekýnd qalǵanda ony tize búktirdim. Sóıtip, fınalda ýkraınalyq djıý-djıtsý sheberimen aıqastym. Qarsylasymdy 5 upaı aıyrmashylyǵymen ońaı uttym. Munan soń «Faıtıng-sıstem» júıesi boıynsha úzdik úshtikke kirdim», - dedi Saqaýlov agenttik tilshisine.
Oljas Saqaýlov - Reseı ІІM Omby Akademııasynyń túlegi. Djı-djıtsýmen 7 jasynan bastap aınalysady. Onyń qorjynynda birneshe respýblıkalyq, Azııa oıyndarynyń júldeleri bar.
