Qostanaılyq polıtseı adasyp ketken Nıgerııa azamatyna kómektesti
QOSTANAI. QazAqparat - Qostanaılyq polıtseı Beıbarys Muhametqalıev adasyp ketken Nıgerııa azamatyna kómektesti, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Almatyda jumys isteıtin Nıgerııa turǵyny EkeStanleyOdnako Qostanaıǵa qydyryp kelgen. Tek óz tilinde ǵana sóıleı alatyn ol oblys ortalyǵynda adasyp qalǵan. Kómekke kelgen polıtsııa qyzmetkerleri sheteldikpen tildese almaǵandyqtan, kezekti demalysynda júrgen Beıbarys Muhametqalıevke habarlasýdy jón sanaıdy. Ol nıgerııalyqtyń máselesin tyńdap, ony úıine qondyryp, kelesi kúni Almatyǵa shyǵaryp salǵan.
«Polıtsııanyń kishi serjanty Beıbarys áriptesteri arasynda polıglot retinde tanymal. Ol Rýdnyı ındýstrııalyq ınstıtýtyn elektr energetıkasy mamandyǵy boıynsha bitirgen. Stýdent shaǵynda shet memleketterge oqýǵa jáne tájirıbeden ótýge eki ret jiberilgen. 2014 jyly «Erazmýs» baǵdarlamasy boıynsha Germanııanyń Vısmar qalasynda tórt aı bolyp kelipti. Bul - stýdentter almasý jónindegi Eýropalyq odaqtyń kommertsııalyq emes baǵdarlamasy. Ol kezge deıin Beıbarys aǵylshyn tilin erkin bilgen. Stýdent ınterulttyq topta óz mamandyǵynyń syrtynda Halyqaralyq bıznes negizderi jáne is júrgizý kýrsynda oqıdy»,- delingen polıtsııa departamenti baspasóz qyzmetiniń habarlamasynda.
Germanııalyq oqytýshylar qazaq balasynyń qabiletine oń baǵa berip, hat jazǵan. Alaıda, Beıbarystyń armany ishki ister organdarynda jumys isteý boldy. Sondyqtan ınstıtýtty aıaqtasymen, 2016 jyly Petropavl qalasyndaǵy áskerı-tehnıkalyq mektepke qujat tapsyrady. Ol maqsaty jolynda tabandylyq tanytty. Sporttyq qabileti jaǵynan da oǵan teńeser eshkim joq-tyn. Qoıan-qoltyq urys jekpe-jeginen sport sheberligine kandıdat, kıkboksıng, aralas jekpe-jekten san dodanyń júldegeri. 2017 jyldyń tamyz aıynan jol-patrýldik polıtsııasy batalonynda tájirıbeden óte bastady. Kishi serjant, eńbek ótili az bolsa da, ózin saýatty qyzmetker retinde kórsete aldy.
Aıta ketý kerek, ol 2018 jyly Qostanaıda adasyp ketken Saýd Aravııasynyń azamatyna kómektesti. Sheteldik azamat qostanaılyq jubaıyna kelgen. Erli-zaıyptylar keshkisin dámhanada tamaqtanýǵa barǵysy kelip, keleńsizdik sol jerde bastalypty.
«Kezekshilik bólimine Karbyshev kóshesindegi keńselik ǵımarattardyń biriniń kúzetshisinen qońyraý kelip túsedi. Ol jumystan tys ýaqytta sheteldik azamattyń júgingenin aıtqan. Beıtanystyń sózine túsinbeı, "102" nómirine habarlasýdy jón tanypty. Radıoefır arqyly aǵylshyn tilin biletin qyzmetker qajet ekeni týraly habarlama tarady»,- dep eske alady polıtseı.
Saýd Arabııasy azamatymen tilge kelgen ol, sheteldiktiń adasyp ketkenin túsingen. Ol dámhanany izdep, aǵylshyn tilindegi ataýy bar bıznes-ortalyqty kezdeser oryn dep oılapty. Beıbarys máseleni ońaı sheship, sheteldikti turǵylyqty jerine jetkizip tastaıdy. Beıbarystyń pikirinshe, qazirgi tańda tilderdi bilý - kásibı qajettilik. Ol kúndelikti qazaq jáne orys tilderinde sóıleıdi. Al aǵylshyn jáne nemis tilderin burynǵy áriptesterimen qarym-qatynas ornatyp turý úshin paıdalanady.
Nıgerııa turǵyny kórsetken kómegi úshin Beıbarysqa alǵysyn bildirdi.
