Qostanaılyq patrýlderge 50-den astam alǵys hat túsken
QOSTANAI. QazAqparat – Qostanaı oblystyq polıtsııa departamentiniń bastyǵy Erlan Omarbekov garnızonǵa tekseris júrgizdi, dep habarlaıdy QazAqparat vedomstvonyń baspasóz qyzmetine silteme jasap.
Ol patrýldik qyzmettiń jeke quramy men áskerı qyzmetshilerdiń nazaryn zańdylyqty saqtaýǵa jáne azamattarmen tyǵyz yntymaqtastyqqa aýdardy. E. Omarbekovtiń aıtýynsha, basty basymdyq - polıtsııa jumysynyń servıstik modelin iske asyrý.
«Qazirgi ýaqytta óńirde «Quqyqtyq tártip» jedel-profılaktıkalyq sharasy júrip jatyr. Negizgi mindet - kósheler men qoǵamdyq oryndardaǵy quqyq buzýshylyqtardyń jolyn kesý jáne óńirdegi jol qaýipsizdigin qamtamasyz etý», - dedi polıtsııa polkovnıgi jeke quramǵa.
Sondaı-aq, polıtsııanyń tehnıkalyq kúshteri men avtokólikteri tanystyryldy. Aqpan aıynyń sońynda oblys ortalyǵy men Rýdnyı qalasynda jol qaýipsizdigin «Ekin Patrol G2» 6 mobıldi júıesi qamtamasyz etedi.
Patrýldik avtokólikke ornatylǵan jabdyq jyldamdyq rejıminiń buzylýyn, JQE basqa da buzýshylyqtaryn anyqtaýǵa, sondaı-aq kólik quraldaryn izdestirý boıynsha jumys isteýge múmkindik beredi.
Vedomstvoda atap ótkendeı, mobıldi júıeler testilik rejımdegi jumys nátıjelerin kórsetti. Bir táýlik ishinde arnaıy jabdyqtalǵan patrýldik mashınalar jol qozǵalysy erejelerin buzýdyń 30-dan astam deregin anyqtap jatyr. Olardyń kómegimen izdeýde júrgen 40-tan astam avtokólik anyqtaldy.
Polıtsııa qyzmetkerleri «Quqyqtyq tártip» jedel-profılaktıkalyq sharasy aıasynda 16 kún ishinde eki myńnan astam ákimshilik quqyq buzýshylyqty anyqtap, 135 qylmysty ashty, onyń ishinde 38-i buryn jasalǵan qylmys. Patrýldik polıtsııanyń barlyq ekıpajdary jolda qıyn jaǵdaıǵa tap bolǵan júrgizýshilerge kómek kórsetý úshin qajetti jabdyqtarmen jabdyqtalǵan. Jyl basynan beri patrýldik polıtseılerge oblys turǵyndarynan 50-den astam alǵys hat kelip tústi.
Avtory: Janna Musabaeva
