Qostanaılyq otbasy Orynborda joǵalǵan qyzyn 83 jyl boıy izdeýde
ASTANA. QazAqparat - Úsh jasar Aǵııashty 1933 jyly ata-anasy Orynbordaǵy balalar úıine qaldyrýǵa májbúr bolǵan. Túıme men Maqsum Qasenovter qyzyn izdep kelgende ınternattyń taraǵanyn jáne barlyq balalardy alyp ketkendiginen habardar bolady. Sodan beri bul otbasy úmitin úzbeı, Aǵııash Qasenovany izdeýde, dep jazady «Orenbýrje» aqparat agenttigi.
Ótken ǵasyrdyń 30-shy jyldary osyndaı oqıǵalar óte kóp bolǵan, sondyqtan ár otbasynyń bastan keshirgen oqıǵalarynyń astynda bir urpaqtyń taǵdyry jatyr.
Qazaqstannan kelgen bul hat Orynbor aýdanyndaǵy «Selskıe vestı» gazetiniń redaktsııasyna joldanǵan. Onyń avtory Sana Manabaeva kóp jyldan beri qandaı da bir jaýap alý maqsatynda gazetterge de, telearnalar da hat jazǵan.
Barlyǵy 1933 jyly bastalǵan bolatyn. Onyń ájesi Túıme Qasenova asharshylyq náýbetinen aman qalý maqsatynda joldasy men úsh balasyn alyp Aqtóbeden Orynborǵa jaıaý attanady.
«Túıme óz balalaryn ashtyqtan qutqarý úshin ýaqytsha balalar úıine berýge májbúr bolady, - dep aıtady Sana Manabaeva. - Biraz ýaqyt ótken soń olardy poıyzǵa mingizip, Qostanaı oblysyna jóneltedi».
Ata-anasy ózimen birge tek eki balasyn alyp qala alady. Úsh jasar Aǵııash ákesin kútý úshin balalar úıinde qalady. Qasenovter jańa jerge ornyqqan soń, otaǵasy qyzyn úıine ákelmek bolyp Orynborǵa barady. Alaıda balalar úıi jabylyp, ondaǵy balalardyń qaıda jiberilgenin anyqtaı almaıdy. Keıinnen soǵys bastalady. Al Aǵııash Qasenova sol kúıi tabylmaıdy.
Anasy uzaq jyldar boıy qyzynan habar kútip, ortalyq telearnaǵa, tanymal «Ot vseı dýshı» baǵdarlamasynyń júrgizýshisi Valentına Leontevaǵa hat joldaıdy. Eshqandaı jaýap kelmegen - Leontevanyń ózi kómek bere almaǵan syńaıly. Túıme Qasenova óziniń Aǵııashyn kútip, ómirden ótedi. Onyń ómirlik amanatyn nemeresi Sana jalǵastyrady.
«Meniń ózim 65 jasqa keldim, - dep aıtady Sana Manabaeva. - Alaıda, ájemiz bizdi ósirdi, jetildirdi, demek onyń qyzyn jáne meniń ápkemdi tabý - meniń mindetim. Ol ómiriniń sońyna deıin izdedi. Ol kezderi orys tilin eshkim jetik bilmeıdi, biraq oǵan qaramastan barlyq jerge jazdyq. Jaýap kelmegendigine qaramastan, ájemiz bir sát te úmitin úzbedi».
